پی آئی اے سیالکوٹ آن دبئی جہاز آتا بناءِ کرے، وزیراعظم نا خصوصی کمکار عثمان ڈار ، صوبائی وزیر چوہدری اخلاق ایئرپورٹ آن مسافر آتے رخصت کریر

اسلام آباد۔ 03 جنوری (اے پی پی) پی آئی اے سیالکوٹ آن دبئی جہاز آتا بناءِ کرے، اولیکو جہاز پی کے 179 نا کمک اٹ 165 مسافر روانہ مسنو۔ پی آئی اے نا ترجمان عبداللہ خان نا کنڈآن جاری اعلامیہ نا رداٹ سیالکوٹ بالی پٹ آ پی آئی اے نا کنڈآن خصوصی بست وبند کننگانے۔ وزیراعظم پاکستان نا خصوصی کمکار عثمان ڈار، صوبائی وزیر چوہدری اخلاق و پی آئی اے جنرل منیجر پسنجر سیلز محمد شفیق ایئرپورٹ آن مسافر آتے رخصت کریر۔ سیالکوٹ آن دبئی نا جہاز آتا بناآن سیالکوٹ وایب و کیب انا علاقہ غاتا مسافر آتے براہ راست سفری آسراتی دوبسنے۔ پی آئی اے نا چیف ایگزیکٹو آفیسر ایئرمارشل ارشد ملک پارینے کہ پی آئی اے پاکستان نا چندی شارتیان ہفتہ وار 31 جہاز دبئی کن چلیفنگ ءِ۔ اوپارے کہ پی آئی اے پاکستانی شاری تے آرام دہ سفری آسراتی تا فراوانی کن ہرممکن گام گیج کننگ ءِ۔ ارشد ملک پارے کہ پاکستان نا بھلا شار تے مسافر آتا گرج آتا رداٹ دنیا تون گنڈنگ انگ ءِ۔