اسلام آباد۔ 03 جنوری (اے پی پی) نیشنل کمانڈ اینڈ آپریشن سینٹر این سی اوسی ٹی دوشنبے نادے آ اڈ ہلوک آ سہب انا دیوان اٹی دینی مرض انا چارٹ نا حساب وکتاب، قومی ویکسین نا حکمت عملی و مچ آ ملک اٹی ناجوڑی تا تالانی آ گپ وتران کننگا۔ این سی او سی نا دیوان بنجائی وزیر ڈٹ بندی شونداری و خصوصی گام گیج اسدعمر، نیشنل کوآرڈنیٹر میجر جنرل محمد ظفر اقبال نا کماشی ٹی مس ہراٹی بنجائی وزیر اقتصادی امور عمرایوب خان و وزیراعظم نا خصوصی کمکار جان جوڑی ڈاکٹر فیصل سلطان ئسک بشخ ہلکر۔ فورم ویکسی نیشن نا المی نظام نا بابت سخت گام گیج کننگ آ امنا کرے۔ این سی او سی ناجوڑی تا تالانی نا ہم جاچ ءِ ہلک و داہیت مون آ بس کہ کوویڈ۔ 19 نا پنچ میکو ریسہ ٹی اومیکرون ویریئنٹ بھاز ترندی اٹ تالان مننگ ءِ۔ تدوک آ مسہ دے اٹی کراچی ٹی مثبت کیس آتا غٹ آن زیات کچ اتون مثبت بیٹ کچ 2 آن 6 درسد اسکان سرمسنے۔ این سی او سی مخلوق آ زور شاغا کہ او کوویڈ۔ 19 نا پنچ میکو ریسہ نا تالانی آن بچنگ کن ویکسین خلفر، ماسک بینر و راجی مری ءِ برقرارتخر۔ داہم پاننگاکہ ویکسین خلفوک آ بندغ آک اومیکرون آن کم زہمی مریرہ۔ این سی او سی ضلع وار ویکسی نیشن نا ہدف آتا ہم جاچ ءِ ہلک و ویکسی نیشن نا مقررہ ہدف آتے دوئی کننگ کن صوبہ غاتے اوار کرسا ہرممکن کوشست کننگ انگ ءِ۔ این سی او سی صوبہ غاتے ہم پارت کرے کہ او ناجوڑی تا تالانی ءِ توننگ کن ویکسی نیشن نا تینا مقرر کروک ہدف آتے زوت آن زوت دوئی کیر۔
