فیصل آباد ۔ 03 جنوری (اے پی پی) وزیر مملکت حوالکاری و شینکاری فرخ حبیب پارینےکہ احساس کفالت پروگرام کن 250 ارب روپئی تخنگانے و 70 لکھ حقدار خاہوت آتیٹی 12 ہزار روپئی بشخنگ انگ ءِ۔ اوداخیال آتا درشانیءِ دوشنبے نادے آ احساس کفالت رجسٹریشن سینٹر سپورٹس کمپلیکس ڈجکوٹ روڈ فیصل آباد نا دورہ نا وخت آ کرے ہراڑے ڈویژنل ڈائریکٹر احساس کفالت رجسٹریشن سینٹرڈاکٹر فیاض احمد اودے حوال تس۔ وزیر مملکت سینٹر آ تعلقدار بندغ آتیکن کروک آ بست وبند آتا جاچ ءِ ہلک۔ داوخت آ گپ وتران کرسا او پارے کہ احساس کفالت پروگرام اٹ ہزار آتا کچ اٹ مخلوق نا رجسٹریشن مننگ ءِ ہنداخاطرآن ہرافک داسکان رجسٹریشن کرفنگ کتنو او تینا خڑک انا نادرہ سینٹر آ تینا رجسٹریشن ءِ کرفر۔ اوپارے کہ ہنداپروگرام کن 250 ارب روپئی تخنگانے و 70 لکھ حقدار خاہوت آتیٹی 12 ہزار روپئی بشخنگ انگ ءِ۔ اوپارے کہ شاریک 8171 آ تینا شناختی کارڈ نمبر ءِ مون ترسا احساس راشن پروگرام نا رداٹ رجسٹریشن کرفر انتئے کہ ہرافک احساس کفالت کن اہل ءُ ہموفک احساس راشن پروگرام نا ہم اہل مریرہ ہرانا کمک اٹ مخلوق ءِ 30 درسد کم نرخ آتیا نت، سی، دال پین پین احساس راشن پروگرام کن پندار کریانہ اسٹور آن دوئی مریک۔ فرخ حبیب پارے کہ احساس راشن پروگرام نا مد اٹی 120 ارب روپئی فراوان کننگ انگ ءِ و اسہ سال اٹی 250 ارب روپئی احساس رجسٹریشن سینٹر نا مد اٹی امداد حکومت فراوان کرینے۔ اوپارے کہ احساس گریجویٹ کن اسکالر شپ اکن حکومت 50 ارب روپئی تسنے ہراڑتون اوار اوار ورناتیکن آسان قسط آتیا وام تا فراوانی برجاءِ تانکہ ہرافتے تون جوان ءُ آئیڈیاز ارے او تینا کاروبار اس بناکرسا تینا نت تیا سلنگ کیر۔ اوپارے کہ احساس پروگرام نا رداٹ 34 پروگرام چلینگ انگ ءُ ہنداوڑ پنجاب اٹی جان جوڑی کارڈ لانچ مسنے ہراڑکن 4 سد ارب روپئی جتا کننگانے و ہندا پروگرام نا رداٹ ہر اُرا سالانہ 10 لکھ روپئی اسکان تینا پسند نا ڈاکٹر آن تینا پسند نا ہسپتال اٹ درمان کرفنگ کیک۔ اوپارے کہ کورونا دین انا سوب آن مچ آ دنیا ٹی کبینی مس ہراڑآن پاکستان ہم زہمی مس ولے ساڑی حکومت لس بندغ نا احساس ءِ کرسا سوشل پروٹیکشن نا پروگرام نا بناءِ کرینے تانکہ کم کٹیا والا بندغ آتے زیات آن زیات ریلیف ملنگ کے۔ اوپارے کہ وزیراعظم عمران خان ریاست مدینہ نا کنڈآ ہِننگ و لس بندغ کن دڑد تخک ہنداخاطرآن نیزگار ءِ ہروڑاٹ ریلیف تننگک۔
