اسلام آباد۔ 03 جنوری (اے پی پی) ایشیائی شونداری بینک تدوک آ کیلنڈر سال اٹی پاکستان ءِ جم وڑاٹ 2.3 ارب ڈالر نا کمک فراوان کرینے۔ داہیت ءِ ایشیائی شونداری بینک انا کنٹری ڈائریکٹر ینگ یی پوسکن آ سال انا وخت آ تینا اسہ کلہو اٹی پارینے۔ تینا ویڈیو کلہو اٹی او پاکستانی تے پوسکن آ سال انا مبارکبادی ترسا پارینے کہ کورونا دین انا جہانی دین اتون مون تننگ کن ایشیائی شونداری بینک پاکستان تون اواری اٹ کاریم کننگ ءِ۔ اوپارے کہ کیلینڈر سال 2021اٹی پاکستان و ایشیائی شونداری بینک انا نیام اٹ کمکاری نا کچ 2.3 ارب ڈالر ریکارڈ کننگانے ہراڑآن پاکستان و ایشیائی شونداری بینک انا نیام اٹ پائیدار شریداری نا عکاسی مننگ ءِ۔ اوپارے کہ داہیت ستاکڑزک کہ پاکستان پائیدار نمو نا دوئی کننگ کن اقتصادی، زری و مالیاتی اصلاحات آ عمل کننگ ءِ ہرانا دوررس زہم مرتب مریک۔ ایشیائی شونداری بینک انا کنڈآن 2021-25پارٹنر شپ سٹریٹجی مون آاتنگانے ہرانا بنداوی مسخت پاکستان ءِ چندی بشخ آتیٹی کمک فراوان کننگ ءِ۔ اوپارے کہ کورونا دین اتون مون تننگ کن ایشیائی شونداری بینک ویکسی نیشن، راجی رکھ، سرکاری بشخ انا انتظام و انصرام ، نجی بشخ ءِ لچکدار کننگ و چاگڑدی رکھ انا بشخ آتیٹی پاکستان تون کمکاری ءِ برجاتخک۔
