اسلام آباد۔29دسمبر (اے پی پی): مزن وزیر عمران خان ءَ پنت ءُ شون کت کہ ملک ءَ گیس ءِ پٹ ءُ پول ءِ واستہ لائسنس آنی جاڑی کنگ ءِ کار ترند کنگ بہ بیت، نوکیں ایل این جی ٹرمینلز ءِ پٹ کنگ ءُ ورچوئل پائپ لائن منصوبگ آنی کشک ءَ پینگ آناں دور کنگ بہ بیت، نارتھ سائوتھ گیس پائپ لائن منصوبگ گیش مھتلی بوھگ ءَ ابید استیں وھد ءُ پاس ءَ سرجم کنگ بہ بنت۔ آئی ءَ اے پنت ءُ شون چارشمبے ءِ روچ ءَ پاکستان ءَ گیس ءِ جاور ھال آنی سر ءَ چار ءُ تپاسی ءِ واستہ مزن تکی دیوان ءِ سروکی ءَ کنان ءَ کت۔ دیوان ءَ بنجاھی وزیر ھزانگ شوکت فیاض ترین، بنجاھی وزیر ھاٹیگ حماد اظہر، بنجاھی وزیر منصوبگ بندی ءُ دیمروئی اسد عمر، بنجاھی وزیر زرئی کار علی حیدر زیدی، مزن وزیر ءِ ھاسیں کمکار محمود مولوی ءُ سیادی داروکیں اپسرگ آں بھر زوری کت۔ دیوان ءَ را ملک ءَ گیس ءِ لوٹ، ملکی امبار ءَ چہ پجاری ءُ ایل این جی ءِ کمیگ ءُ درآمد ءِ ھوالگ ءَ سرپدی کتگ بوت۔ دیوان ءَ را گوشگ بوت کہ ملک ءَ گیس ءِ استیں لوٹ 4700ایم ایم سی ایف ڈی انت ایش سردی ءَ گیش بوھان ءَ 600 ءَ بگر تاں 6500 ایم ایس سی ایف ڈی ءَ تاں روت۔ ملک ءَ بوھوکیں گیس استیں سپلائی 3300 ایم ایم سی ایف ڈی انت ایش ھمک سال کم بوھگ ءَ انت ھمے سبب ءَ گیس ءِ کمیگ ءَ را سرجم کنگ ءِ وا ستہ ایل این جی درآمد کنگ کپ ایت۔ استیں انفراسٹرکچر ءِ گوما سردی ءَ کساس 1000 ایم ایم سی ایف ڈی ءِ کمی پیداک بیت ایشی ءَ گوں گر ءُ چیل بوھگ ءِ واستہ جتا جتائیں آپشنز وتی کنگ بوھگ ءَ انت۔ کسانوکیں وھد ءُ پاس ءِ واستہ گسی ٹرمینلز آنی استیں ازمکار ءَ را گہتر جوڑ کنگ بوھگ ءَ انت ءُ ورچوئل پائپ لائن لائنس ءِ کار آناں ترند کنگ بوھگ ءَ انت۔ مزن وزیر ءَ نارتھ سائوتھ گیس پائپ لائن ءِ ارزشت ءِ سر ءَ زور پر دیان ءَ پنت ءُ شون ک کہ گیشینتگیں وھد ءُ پاس آنی تہ ءَ ابید مھتلی ءَ ایشی ءِ پد ءُ رند دل یکیمی جوڑ کنگ بہ بیت۔
