کراچی۔29دسمبر (اے پی پی): صدر ءِ مملکت ڈاکٹر عارف علوی ءَ کراچی ءَ مھکمیں کاروباری دیمروئی نمبگ آنی واستہ جوانیں منصوبگ بندی ءِ ضلورت ءِ سر ءَ زور پر دیان ءَ گوشت کہ درستاں چہ گیش ریونیو ءُ ٹیکس والا ایں اے شہر ءِ بنیاتی انفراسٹرکچر ءَ گہتری ءِ ضلورت انت۔ تاجریں برات آناں چارمی صنعتی آشوب ءِ برورد در جنگ ءِ واستہ آئی ٹی ءِ شوبگ ءَ سرمایہ کاری بکن انت۔ اے ھیالانی درشانی آئی ءَ کراچی چمبر آف کارمرس اینڈ انڈسٹریز ءَ 17 ھپدھمی “مائی کراچی نماش” ءِ بنگیجی مراگش ءَ گوں گشتانک دیان ءَ کت۔ اے موہ ءِ سر ءَ بنجاھی حکومت ءِ نیمگ ءَ انوں زوتاں کتگیں گرین لائن منصوبگ ءِ بابت ءَ گپ ءُ تران کنان ءَ صدر ءَ گوشت کہ اے منصوبگ اے شہر ءِ مردم آناں آسراتی ءُ آسودگی پجارین ایت۔ شہر ءَ آپ ءِ جیڈھ آنی بابت ءَ تران کنان ءَ صدر ءَ گوشت کہ K4 منصوبگ ءِ مول ءُ مراد شہر ءِ ھمک روچی آپ ءِ ضلورت ءَ را سرجم کنگ انت۔ امیت انت کہ اے 2023 ءَ تاں سرجم بیت۔ صدر مملکت ءَ گوشت کہ سرجمیں ملک ءَ ورنا آناں ازمکاری ءُ ھیل کاری پجاری کنگ حکومت ءِ اولی ترجی داتگیں کار آنی تہ ءَ ھوار انت۔ تانکہ روزگار ءُ کاروباری ازمکاری آناں گیش ودینگ بہ بیت۔ پیسریگیں صدر کے سی سی آئی زبیر موتی والا ءَ تاجر برات آناں سرجمیں کمک ءُ ھمبراھی کنگ ءِ پد ءَ صدر ءِ شگر ءُ منت واری گپت۔
