اسلام آباد۔27دسمبر (اے پی پی): مزن وزیر عمران خان ءَ راجی سلامتی کمیٹی ءِ دیوان ءَ ملک ءِ اولی راجی سلامتی پالیسی 26-2022 ءِ منظوری ءَ را تاریخی گامگیج نامینتگ ءُ گوشتگ کہ پاکستان کجام ھم توکی ءُ درئی بیم ءُ ھوپ ءَ گوں گر ءُ چیل بوھگ ءِ ازم ءَ دار ایت۔ راجی سلامتی پالیشی ءِ جوانیں پد ءُ رندی ءِ واستہ توامیں ادارگ آناں مھکمیں گامگیج وتی کنگ لوٹ ایت۔ دو شمبے ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر عمران خان ءِ سروکی ءَ راجی سلامتی کمیٹی ءِ دیوان برجم بوت ایشی ءِ تہءَ درئی ، دیمپانی ، اھوالکاری ءُ شنگ کاری، تہی ، ھزانگ، بنی آدمی ھک ءِ بنجاھی وزیر ، چیئرمین جوائنٹ چیفس آف سٹاف کمیٹی ، سئے ایں سلاھ بندیں ارد آنی سروک ، راجی سلامتی ءِ مشیر، ءُ کلانہ ایں اردی ءُ سول کارندہ آں بھر زوری کت۔ کمیٹی ءَ ملک ءِ اولی راجی سلامتی پالیسی 26-2022 ءِ منظوری دات مزن وزیر عمران خان ءَ دیوان ءَ گوں گشتانک دیان ءَ گوشت کہ ملک ءِ رکھینگ شہری آنی رکھینگ ءَ گوں بندوک انت۔ آ ئی ءَ گوشت کہ پاکستان کجام ھم توکی ءُ درئی بیم آں گوں گر ءُ چیل بوھگ ءِ واستہ سرجم ءُ برجمیں ازم ءَ دار ایت۔ مزن وزیر ءَ ملک ءِ اولی راجی سلامتی پالیشی ءِ تیاری ءُ منظوری ءَ را یک تاریخی گامگیج ءِ نامینان ءَ گوشت کہ راجی سلامتی ڈویژن ءُ توامیں سیادی داروکیں ادارگ آنی کوشست لائک ءِ توسیپ ءُ ستائی ایگ انت۔ آئی ءَ پنت ءُ شون کت کہ پالیشی آنی جوانیں پد ءُ رند ءِ واستہ توامیں ادارگ آناں مھکمیں گامگیج وتی بکن انت۔ آئی ءَ راجی سلامتی مشیر ءَرا پالیشی آنی پد ءُ رند ءِ واستہ ھمک ماھی رپوٹ پیش کنگ ءِ ھم پنت ءُ شون کت۔ راجی سلامتی ءِ مشیر ءَ دیوان ءَ را پالیشی ءِ ھوالگ ءَ بریفنگ ھم دات۔ راجی سلامتی کمیٹی ءَ چہ ایشانی منظوری ءَ چہ پد پالیشی بنجاھی کابینہ ءِ دیم ءَ پیش کنگ بیت۔
