اسلام آباد۔ 27 دسمبر (اے پی پی) وزیرخارجہ مخدوم شاہ محمود قریشی پارینے کہ اقتصادی سفارتکاری نا سرسہبی کن ننے غٹ کوشست آتے کاریم اٹ اتوئی مریک، ملکی برآمد آتے ودفنگ کن پوسکن آ گام گیج آتا گرج ءِ، روشن ڈیجیٹل اکاؤنٹ گام انا رداٹ، 175 ملک آتیان اکاؤنٹ آتیٹی 2.9 ارب ڈالر آں زیات زر جمع مس۔ دوشنبے نادے آ وزارت خارجہ ٹی اقتصادی سفارتکاری نا بابت بڑزکو کہولی دیوان نا کماشی ءِ کرسا وزیرخارجہ پارے کہ کنے داخوشی مس کہ اقتصادی سفارتکاری آ چکار زیات مننگ ءِ۔ دیوان اٹی اسپیشل سیکرٹری خارجہ رضابشیر تارڑ، چندی ملک آتیٹی تعینات پاکستانی سفیر آتون اوار وزارت خارجہ نا سینئر آفیسر آتون اوار نیویارک اٹی پاکستان نا آخبتی مندوب منیر اکرم ، امریکہ ٹی پاکستان نا سفیر اسد مجید، ترکی ٹی پاکستان نا سفیر سائرس سجاد قاضی، آسٹریا ٹی پاکستانی سفیر آفتاب احمد کھوکھر، ایران اٹی تعینات پاکستانی سفیر رحیم حیات قریشی، روس اٹی پاکستان نا سفیر شفقت علی خان، نیدر لینڈ اٹی تعینات پاکستانی سفیر سلجوک مستنصر تارڑ، جنیوا ٹی پاکستان نا آخبتی مندوب خلیل ہاشمی ئسک ساڑی ئسر۔ اوپارے کہ زرگزرانی شونداری، قومی سلامتی تون تفوک ءِ۔ وزیر اعظم عمران خان نا کماشی ٹی، پاکستان، جغرافیائی سیاست آن جیواکنامکس نا کنڈا چکار کرینے، سرپند مریوہ کہ تنیا اقتصادی سفارتکاری بدلی نا کسر آ ہِننگ کن جادو نا چھڑی اس مننگ کپک۔ داڑکن ننے غٹ کوشست آتے کاریم اٹ اتوئی مریک۔ بطور سفیر، نما کڑد بھاز اہمیت تخک۔ دااسہ بھاز بھلو زمواری اسے۔ شاہ محمود قریشی پارے کہ وزارت خارجہ نا کنڈآن ، اقتصادی سفارتکاری آ اِرا سفیر آتا کانفرنس اڈتننگا، اوکان پد 2020اٹی نیروبی ٹی پاک۔ افریقہ واپاری شونداری کانفرس اڈتننگا۔ افریقہ ننکن اسہ اہم ءُ ڈیہہ اسے ہرانا اقتصادی لائخی ءِ کاریم اٹ اتنگ کن، حکومت پاکستان افریقہ ٹی پنچ مشن ملسا تینا سفارتی ساڑی گری ءِ ودفینے، دا گام گیج آتیان داتم اسکان حکومت نا کوشست آتیان درج ذیل فائدہ دوئی مسنے، : پاکستان نا ’’کاروبار کننگ اٹ آسانی‘‘ نا درجہ بندی ٹی تدوک آ اِراسال اٹی 39 پوائنٹ آتا گچینی بسنے۔ ننا اسٹاک ایکسچینج ءِ ایشیانا گچین کارکڑد نا نشان تروک آ مارکیٹ گوندنگانے۔ ننا کاروباری پت انا درجہ بندی ٹی 59 پوائنٹ آتا ودکی مسنے، افریقی ملک آتون 7 درسد نا است بڈودکی اتون پاکستان نا جم واپار ودانے۔ اوپارے کہ روشن ڈیجیٹل اکاؤنٹ گام انا رداٹ ، 175 ملک آتیان 299000 آن زیات اکاؤنٹ آتیٹی 2.9 بلین امریکی ڈالر آن زیات زر جمع مسنے۔ پوسکن آپاکستان سرٹیفکیٹ آتیٹی کم و ود2 بلین امریکی ڈالرز نا زرکاری کننگانے۔ وخت بسنے کہ نن تینا مقرر کروک ہدف آتے دوئی کننگ کن تینا غٹ تر توانائی تے خڑچ کین۔ شاہ محمود قریشی پارے کہ اقتصادی سفارتکاری، بیرہ درآمد و برآمد آتیان کیہی زیات گیشتر تصور اسے۔ داٹی ہمو غٹ گام گیج آک اوار ءُ ہرا ملک انا زرگزران اٹ گچینی اتنگ اٹ کمکار مننگ کیرہ، داکوشست آتیٹی واپار، زرکاری و سیل وسوات ءِ مون آ دننگ، پیشن نا ملک روزگار ودی کننگ، ترسیلات زر اٹی ودکی و ٹیکنالوجی نا گدریفنگ اٹ آسراتی فراوان کننگ اوار ءِ۔ چندی ملک آتیٹی تعینات پاکستانی سفیر آک اقتصادی سفارتکاری نا بابت داتم اسکان کروک آ کوشست آتیان وزیرخارجہ ءِ معلومدار کریر۔
