اسلام آباد۔ 27 دسمبر (اے پی پی) چیئرمین سینیٹ محمد صادق سنجرانی پارینے کہ پاکستان سوڈان تون تینا تعلقداری تے قدر انا نظر اٹ ہرک، سیاست، واپار ، زرگزران و دودوربیدگ تون اوار تین پہ تینی فائدہ غاتا غٹ بشخ آتیٹی سوڈان تون تعلقداری تے پین سوگوی تننگ نا گرج ءِ۔ سینیٹ سیکرٹریٹ نا رداٹ داہیت ءِ او سوڈان کن پاکستان نا پندار سفیر مہر بہروز ریکی بلوچ تون گپ وتران کرسا پارے ہرا چیئرمین سینیٹ تون اوڑدہی کرے۔ اوڑدہی ٹی پاکستان و سوڈان نا نیام اٹ ہڑتوم آ کنڈآتا تعلقداری آ گپ وتران کننگا۔ چیئرمین سینیٹ میر بہروز ریکی بلوچ ءِ بطور سفیر پندار مننگ آ مبارکبادی تس۔ چیئرمین سینیٹ پارے کہ اومیت ءِ پندار سفیر پاکستان و سوڈان نا نیام اٹ ہڑتوم آ کنڈآتا زرگزرانی تعلقداری تے پین سوگو کننگ کن پبی کوشست کیک، سوڈان تون تینا تعلقداری تے قدر انا نظر اٹ ہرک و اوفتے پین سوگو کننگ خواہک ۔ چیئرمین سینیٹ سیاست، واپار ، زرگزران و دودوربیدگ تون اوار تین پہ تینی فائدہ غاتا غٹ بشخ آتیٹی سوڈان تون تعلقداری تے پین سوگوی تننگ نا گرج آ زور شاغا۔ اوپارے کہ ہڑتوم آ ملک آتا نیام اٹ بڑزکو کہولی دورہ، پارلیمانی ڈل آتا ہن و بر و وزارتی رابطہ غاتا گرج ءِ، ہڑتوم آ ملک آتا نیام اٹ واپاری و زرگزرانی تعلقداری تے مون آ دننگ آن بیدس سوڈان اٹی پاکستانی تیاری مروک مصنوعات، دوائی تا برآمد آتے ودفنگ کن گام گیج کننگے۔ اوپارے کہ پاکستان اٹ سیل و سوات نا مون آ دننگ وسوڈان تون دودوربیدگی رابطہ غاتے سوگوی تننگ کن ہم کوشست آتے ترند کننگے۔ اوڑدہی ٹی سینیٹر ز نصیب اللہ بازئی، محمد اکرم، مہرتاج روغانی، لال دین و سیکرٹری سینیٹ محمد قاسم صمد خان ئسک ہم ساڑی ئسر۔
