ملتان۔ 27 دسمبر (اے پی پی) بنجائی وزیر نیشنل فوڈ سیکورٹی اینڈ ریسرچ سید فخرامام پارینے کہ داسال شرح نمو چار آن پنچ درسد مننگ نا گمان ءِ، ہرا تدوک آسال 3.9 درسد ئسک۔ تدوک آ سال کشت وکشار نا پیدوار اٹی ودکی 2.7 درسد ئس ہرادے ودفنگ نا کوشست کننگ انگ ءِ۔ پاکستان اٹی داسال 4 فصل آتیٹی ریکارڈ پیدوار مس۔ داخیال آتا درشانی ءِ او میاں نواز شریف کشاری یونیورسٹی ٹی اڈ ہلوک دود آن تران کرسا کرے۔ بنجائی وزیر مستی پارے کہ تدوک آ 12 سال آن پاکستان اٹی خولم نا اوسط پیدوار 28 آن 30 من فی ایکڑ مسنے۔ تدوک آ سال 2 من ودکی اٹ ریکارڈ پیدوار مسنے۔ کشاری شونداری ٹی اسہ اسہ من فی ایکڑ ودکی آن ننا پیدوار اٹی ودکی مس۔ اوپارے کہ کٹنگ ایج ٹیکنالوجی برک تو نن دنیا نا مقابلہ ءِ کننگ کینہ۔ اومستی پارے کہ پال انا پیدوار اٹی پاکستان ہفت میکو بھلا ملک ءِ ولے ویلیو ایڈیشن بیرہ 30 درسد ءِ۔ ویلیو ایڈیشن کرسا ملک اکن زرمبادلہ دوئی کننگ کینہ۔ سید فخرامام پارے کہ نن چین آن 16 ارب ڈالر زنا درآمد کینہ وخت اس کہ برآمد آک بیرہ یک و نیم ارب ڈالر نا ءُ۔ دھان نا داسال ریکارڈ پیدوار مس۔ نن وزارت واپار تون ہیت کرینن۔ نن سرپلس برنچ ایکسپورٹ کننگ کینہ۔ داکان مست میڈیا تون گپ وتران کرسا سید فخرامام پارے کہ پاکستان اٹی یوریا کھد انا ہچ ءُ کمتی اس اف۔ یوریا نن ملک انا گرج آتے پورو کیک داسال پیدوارہم زیات مسنے۔ کوشست ءِ کہ بزغرآتے یوریا جوان نہاد آ فراوان کننگے۔ یوریا کھد انا پیدوار اٹی کمتی آخا فراوانی ٹی ویل ءِ۔ منافع خور و کھد اسٹاک کروک آتا برخلاف کارروائی کننگ انگ ءِ۔ انٹرنیشنل مارکیٹ اٹی یوریا نا نہاد دہ ہزار آن زیات ءِ تو کھد ءِ سمگل کننگ نا کوشست کننگ انگ ءِ۔ گڑاس مخلوق کھد ءِ داکان پیشن نا ملک گدریفرہ و دابابت گڑاس مخلوق ءِ ہلکونن ہم۔ گڑاس مخلوق کوڑی کیک اوفتا برخلاف کارروائی کننگ انگ ءِ۔ بنجائی وزیر پارے کہ تدوک آ سال یوریا 6 ملین ٹن پیدوارئس داسال اوکان ہم مسہ لکھ ٹن زیات ءِ۔ کھد اتون گنڈوک کمپنی تے 210 ارب روپئی نا سبسڈی تننگانے۔ 210 ارب روپئی نا گیس آ مینو فیکچرءِ سبسڈی تننگک۔ اوپارے کہ پاکستان نا تاریخ اٹ اولیکو وار بنجائی حکومت صوبائی حکومت آتیان خولم نا بارواٹ ہفتہ وار کارکڑد رپورٹ ہلنگ ءِ۔ اوپارے کہ خولم نا نہاد 1950 فی من پڑو کریسن داسہ وخت اتون ہرنہ کہ انت نہاد اس مقرر کروئی ءِ۔ اگہ داوار پِر وخت آ مس تو خولم نا درکار ہدف آتے دوئی کینہ، داوار سوا 6 لکھ ٹن سٹریفائیڈ بج ننتون ساڑی ئسک۔ جی ڈی پی نا 19.3 بشخ کشاری اجناس آن مریک۔ اوپارے کہ بزغرآتے مسہ سال اٹی 11 سد ارب نا کٹیا ملانے۔
