اسلام آباد۔ 27 دسمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ اینو غٹ آن بھلا چیلنج قائد اعظم محمد علی جناح نا پاکستان ءِ پدی اتنگ ءِ، قائد اعظم و علامہ اقبال اسہ ہندن ءُ ریاست اسے جوڑ کننگ خوائسرہ ہراڑے اسلام نا منوک آک و اقلیت آک آجوئی اٹ زند ءِ تیر کننگ کیر، وزیراعظم عمران خان ہمو پاکستان نا ہیت ءِ کیک ہرانا تغ ءِ قائد اعظم محمد علی جناح خناسس۔ داہیت ءِ او دوشنبے نادے آ داڑے قائداعظم محمد علی جناح نا بابت عکسی نمائش نا بنائی دود آن تران کرسا پارے۔ بنجائی وزیر حوالکاری پارے کہ قائد اعظم محمد علی جناح نا کلہو بھاز پیدوار ءِ، ہندوستان و بنگلہ دیش نا چندی رائٹرآک قائد اعظم نا بارواٹ کنفیوژن نا گواچی ءُ۔ اوپارے کہ ہراوڑنا پاکستان اس قائد اعظم خواہسکہ اوتینا مسہ بھلا تقریر آتیٹی پیدوار کریسس، قائد اعظم و علامہ محمد اقبال ماڈرن و شونداری پسند سوچ انا حامل راہشون ئسر، برصغیر نا مسلم سرکڑدہ غاک پہہ مسوسر کہ آخبت اٹ مسلمان و ایلو اقلیت آتون انت سلوک مریک۔ اوپارے کہ علامہ اقبال بھاز مہالو خناسس کہ مسلمان تے انت مشکل پیش بننگ کیک، قائد اعظم ہندوستان نا سیاست ءِ ہرسا پاکستان ءِ جوڑ کننگ نا فیصلہ کرے۔ بنجائی وزیر حوالکاری پارے کہ پاکستان اٹ سیالکوٹ واقعہ غا مچ آ پاکستانی قوم یکجا مرسا ترند انگا لوز آتیٹی مذمت ءِ کریر، ہندوستان اٹی داوڑنا واقعہ غاک ہڑدے مریرہ، اینو بھارت اٹ مسیحی برادری و مسلمان تتون انتس کہ مننگ ءِ او دنیا نا مون آٹے،نریندر مودی و بی جے پی اقلیت آتا زند ءِ ژند کرینو۔ اوپارے کہ نریندر مودی نا حکومت نا رداٹ اینو بھارت زوال نا گواچی ءِ۔ بنجائی وزیر حوالکاری پارے کہ پاکستان ءِ جوڑ کننگ نا مسخت اقلیت آتا حق ءِ رکھ تننگ ئس، پاکستان دا ڈیہہ نا روشنا اومیت ءِ، قائد اعظم تینا کلہو اٹی پیدوار ئس، اوبا دا کلہو ءِ دوئی کننگ غٹ آن بھلا جنگ ئس۔ اوپارے کہ قائد اعظم محمد علی جناح نا ودی دے انا وخت آ عکسی نمائش نا اڈتننگ ستاکڑزک۔ بنجائی وزیر حوالکاری قائد اعظم نا ودی دے ءِ شایان شان وڑاٹ اڈتننگ، اسلام آباد اٹی آتش بازی و رنگ و نور نا محفل نا اڈتننگ آ غٹ منتظمین آتے مبارکباد پیش کرے۔
