مسیحی برادری پاکستان اٹ امن و شونہالی نا مون آ دننگ اٹ تینا کڑد ءِ ادا کرساکیک، صدر مملکت ڈاکٹر عارف علوی

اسلام آباد۔ 24 دسمبر (اے پی پی) صدر مملکت ڈاکٹر عارف علوی پاکستان تون اوار مچ آ دنیا نا مسیحی برادری ءِ کرسمس نا مبارکبادی ترساپاکستان اٹ رہینگوک آ غٹ اقلیت خاص وڑاٹ مسیحی برادری نا ملک اکن خذمت آتا ستاءِ کرے و یقین نا درشانی ءِ کرینے کہ او پاکستان اٹ امن و شونہالی نا مون آ دننگ اٹ تینا کڑد ءِ ادا کرسا کیرہ، حکومت آئین پاکستان نا رداٹ اقلیت آتون اوار غٹ پاکستانی تے بریبر وارخواہی فراوان کننگ کن سنبرینگوک ءِ۔ کرسمس 2021ء نا وخت آ تینا کلہو اٹی صدر مملکت پارے کہ کرسمس نا دا خوشی نا وخت آ ، پاکستان و مچ آ دنیا ٹی مسیحی برادری ءِ کرسمس آ مبارکبادی پیش کیوہ۔ اینو پاکستان و مچ آ دنیا ٹی لکھ آ مسیحی حضرت عیسیٰ علیہ السلام نا ودی دے انا خوشی ءِ اڈتننگ ءُ۔ حضرت عیسیٰ علیہ السلام ءِ دا دنیا ٹی امن، ایلمی و انسانیت نا شرف نا علامت نا وڑاٹ گدریفنگا۔ دادے ننے ہمو قدر آتا یات ترفک ہرافتیا حضرت عیسیٰ علیہ السلام تینا زند اٹی عمل کرے۔ اونئے بیرہ ناجوڑ انسانیت ءِ شفا تس بلکن رواداری ، مہرومریبت و ہمدردی نا بڑزکو قدر انا ہم تبلیغ کرے۔ اوپارے کہ حضرت عیسیٰ علیہ السلام انسانیت ءِ مہرومریبت ، امن، رواداری وہمدردی نا ابدی کلہو ءِ تس و کرسمس ہمو کلہو آ غوروفکر کننگ نا اسہ گچین ءُ موقع اسے، نن ، بحیثیت مسلمان، اللہ تعالیٰ نا عظیم پیغبرآتیان اسٹ مننگ نا سوب آن ہم اونا خاص شرف ءِ کینہ۔ صدر عارف علوی پارے کہ قائد اعظم محمد علی جناح پاکستان نا جوڑ مننگ نا اولیکو دے آن پاکستان اٹ رہینگوک آ غٹ برادری کن ، بے پرخ مذہب، کسب یانسل، بریبری، آجوئی و رکھ انا پالیسی نا پڑو ءِ کرے۔ ہنداوڑ پاکستان نا آئین غٹ شاری تے ، بلالحاظ مذہب، ذات پات و نسل، بنداوی حق انا ضمانت ایتک۔ حکومت پاکستان اقلیت آتون اوار غٹ پاکستانی تے بریبر وارخواہی فراوان کننگ کن سنبرینگوک ءِ ۔ پاکستان اٹ شاری تے غٹ حق دوئی ءِ و اوفتے زند انا غٹ بشخ آتیٹی واکدار جوڑ کننگ کن چندی گام گیج کننگانے۔ اوپارے کہ کنے داپاننگ تون بھاز خوشی مننگ ءِ کہ پاکستان اٹ اقلیت آک ملکی شونداری و شونہالی ٹی زیات آن زیات بشخ ہلنگ ءُ۔ داہیت مچ آ ملک اٹی غٹ عقیدہ غاتا نیام اٹ بین المذاہب ہم آہنگی و سیوت نا ڈیک ءِ۔ داہمو جوزہ ءِ ہرا ننے تینا نعمت و عزیز قدر انا خوشی ءِ اڈتننگ کن اسہ خاہوت اسے آنبار گنڈک۔ صدر مملکت پارے کہ دا خوشی نا دے آ، ای پاکستان اٹ رہینگوک آ غٹ اقلیت خاص وڑاٹ مسیحی برادری نا ملکی راجی و اقتصادی شونداری، جان جوڑی و تعلیم نا بشخ آتیٹی خذمت وکڑد انا ستاءِ کیوہ، کنے یخین ءِ کہ او پاکستان اٹ امن وشونہالی نا مون آ دننگ اٹ تینا کڑد ءِ ادا کرسا کیرہ۔