توانائی نا بشخ اٹی اصلاحات کن ایشیائی شونداری بینک انا کنڈآن 30 کروڑ ڈالر نا کمک دوئی مس، ایکسچینج ریٹ ءِ سوگو تخنگ اٹ کمک رسینگک، عمرایوب

اسلام آباد۔ 24 دسمبر (اے پی پی) توانائی نا بشخ اٹی اصلاحات کن ایشیائی شونداری بینک انا کنڈآن پاکستان ءِ 30 کروڑ ڈالر نا کمک دوئی مس۔ بنجائی وزیر اقتصادی امور عمرایوب خان دا ہیت ءِ پک کرسا پارینے کہ پاکستان ءِ توانائی نا بشخ اٹی اصلاحات کن ایشیائی شونداری بینک انا کنڈآن 30 کروڑ ڈالر نا کمک دوئی مسنے۔ داڑآن نئے بیرہ پاکستان نا زرمبادلہ نا کوڑی سوگو مریک بلکن ایکسچینج ریٹ ءِ سوگوتخنگ اٹ ہم کمک رسینگک۔ بنجائی وزیر پارے کہ توانائی نا بشخ اٹی اصلاحات نا پروگرام کن کمکاری نا منظوری دا پروگرام و اونا نفاذ نا رداٹ جہانی مالیاتی ادارہ غاتا کنڈآن پاکستان نا حکومت آ پت انا درشانی ءِ۔ بنجائی وزیر پارے کہ پاکستان نا حکومت زرگزران، توانائی، کیپیٹل مارکیٹس، محصولات و اسلوب حکمرانی ٹی گچینی کن اصلاحات نا پروگرام ءِ مون آودفنگ اٹ سنبرینگوک ءِ۔ اوپارے کہ داپروگرام آن گردشی وام تا کچ انا مون ءِ توننگ، اسلوب حکمرانی و توانائی نا بشخ اٹی بنداوی پنجر ءِ گچین کننگ اٹ کمک رسینگک۔