فوجداری کانوداٹی ہیبداری تا سوب آن اہم و حساس مقدمہ غاتیٹی انصاف اٹ تاخیر مننگ ءِ، ڈاکٹر بابر اعوان

اسلام آباد۔ 24 دسمبر (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ فوجداری کانود اٹی ہیبداری نا سوب آن اہم و حساس مقدمہ غاتیٹی انصاف اٹی تاخیر مننگ ءِ، عدلیہ، مقننہ و پارلیمنٹ ءِ کانود و انصاف آ بش مروک آ سوج آتا ادراک ءِ تینا کرسا تینا کڑد ءِ ادا کروئی مریک۔ جمعہ نادے آ قومی اسمبلی ٹی سانحہ سیالکوٹ نا بابت ہیت کرسا ڈاکٹر بابر اعوان پارے کہ سانحہ سیالکوٹ نا سوب آن پاکستان نا تشخص آ سوج بش مسنے۔ نن دا واقعہ نا ترندانگا لوز آتیٹی مذمت ءِ کینہ۔ اوپارے کہ سانحہ سیالکوٹ نا دوبہ دارآتے دزگیر کننگانے۔ جاست وپاست آخیریکو ریسہ غاتیٹی ءِ و اونا چالان ءِ انسداد دہشت گردی نا عدالت اٹ پیش کننگک۔ اومیت ءِ دا باندات نا حساسیت ءِ مون آتخسا چالان ءِ زوت عدالت اٹ پیش کننگک۔ ڈاکٹر بابر اعوان پارے کہ پاکستان نا میڈیا، عالم دین، سول سوسائٹی و سیاسی سرکڑدہ غاک داسانحہ غا سرجمی اٹ ہیت کرینو۔ اوپارے کہ پارلیمنٹ نا ہڑتوم آایوان تے مرے کہ فوجداری کانود نا ہیبداری تے مر کننگ کن تینا کڑد ءِ ادا کیر۔ ڈاکٹر بابر اعوان پارے کہ اے پی ایس پشاور نا سانحہ نا بابت ہم داسکان گڑاس مقدمہ عدالت آتیٹی تموک ءُ، داکان بیدس نور مقدم و زینب کون آ واقعہ غاتیا ہم انصاف اٹی تاخیر مننگ ءِ ، داناسوب فوجداری کانود اٹی ہیبداری ءِ و اونا سوب آن پولیس نا مورال ہم اثرانداز مسنے۔ اوپارے کہ کانود و انصاف آ بش مروک آ سوج آتا بابت عدلیہ ، مقننہ و پارلیمنٹ ءِ تینا کڑد ءِ ادا کروئی مریک۔