پاکستان نا شونداری و شونہالی ٹی مسیحی برادری نا اہم ءُ کڑد اسے،بنجائی وزیر حوالکاری چوہدری فواد حسین نا ’’اے پی پی‘‘ نا کنڈآن کرسمس نا دود آن تران

اسلام آباد۔ 24 دسمبر (اے پی پی) بنجائی وزیر حوالکاری و شینکاری چوہدری فواد حسین پاکستان نا شونداری و شونہالی ٹی مسیحی برادری نا کڑد انا ستاءِ کرسا پارینے کہ پاکستان نا جوڑ مننگ نا بھلا مسخت اقلیت آتا حق انا رکھ ئس، قائد اعظم محمد علی جناح 11 اگست 1947 ء آ آئین ساز اسمبلی آن تران اٹی پیدوار کریسس کہ پاکستان نا ریاست اٹی اقلیت آتا حق ءِ پورو رکھ دوئی مریک۔ ’’اے پی پی‘‘ نا کنڈآن کرسمس نا دود آن تران کرسا بنجائی وزیر حوالکاری پارے کہ کرسمس نا دلچسپ و زبردست ءُ تاریخ اسے، ہرپوسکن آ صدی ٹی کرسمس اٹی پوسکن آ رنگ پُرمرسا کرے، کرسمس ءِ مدام خوشی تا تہوار تکنگک۔ اوپارے کہ پاکستان نا شونداری و شونہالی ٹی مسیحی برادری نا اہم ءُ کڑد اسے، پاکستان نا آخبت اٹ اقلیت آتا کڑد انا پین ستاءِ کننگک۔ اوپارے کہ داوڑنا دود آتا اڈتننگ داخاطرآن ہم المی ءِ کہ مخلوق ءِ پاننگ مرے کہ ریاست اٹ غٹ اقلیت آتا مخلوق اوار ءِ۔ بنجائی وزیر حوالکاری ، وزارت حوالکاری و اے پی پی ٹی کرسمس نا دود انا اڈتننگ نا ستاءِ کرسا مسیحی برادری ءِ کرسمس نا خوشی تا مبارکبادی تس۔ داوخت آ بنجائی وزیر حوالکاری کرسمس نا کیک اس کاٹ کرے و مسیحی ملازم آتیٹی سووینئرز ہم بشخا۔ دود اٹی بنجائی سیکرٹری حوالکاری شاہیرہ شاہد، منیجنگ ڈائریکٹر اے پی پی مبشر حسن، ڈائریکٹر جنرل انفارمیشن سروسز اکیڈمی سعید جاوید، ایگزیکٹیو ڈائریکٹر اے پی پی عدیلہ رباب، مسیحی ملازم و اوفتا خاہوت آتون اوار ایلوفک ہم ساڑی ئسر۔