لاہور۔ 23 دسمبر (اے پی پی) وزیراعظم عمران خان تون وزیراعلیٰ پنجاب سردار عثمان بزدار پنچ شنبے نادے آ داڑے ایوان وزیراعلیٰ ٹی اوڑدہی کرے و وزیراعظم ءِ پنجاب اٹی برجاشونداری ڈٹ آتیا پیش رفت ، بست و بندی امور و امن و ایمنی نا حالیت آتیان معلومدار کننگا۔ اوڑدہی ٹی پنجاب اٹی کھد انا بزغرآتے بے سلنگ آن فراوانی کن کروک آ انتظامی گام گیج آتیان ہم وزیراعظم ءِ معلومدار کننگا۔ وزیراعظم صوبہ ٹی برجاشونداری ڈٹ، انتظامی امور و امن و ایمنی نا حالیت آتے است جم گوندسا پین گچینی اتنگ نا پارت جاری کرے، وزیراعظم صوبائی انتظامیہ ءِ ڈٹ آتا اثر آتے الس اسکان سرکننگ کن پبی گام گیج کننگ نا پارت کرے۔ وزیراعظم پارے کہ صوبہ ٹی برجا شونداری ڈٹ آک وخت آ پورو مریرو الس ءِ ہروڑنا ریلیف نا فراوان کننگے، وزیراعظم حکومت نا آسودہی ڈٹ آتا اثرآتے الس اسکان سرکننگ کن گام گیج کننگ نا پارت کرے۔ داوخت آ چیف سیکرٹری پنجاب کامران علی افضل ، آئی جی پنجاب راؤ سردار علی خان و وزیراعلیٰ پنجاب نا پرنسپل سیکرٹری عامر جان ئسک ہم ساڑی ئسر۔
