اسلام آباد۔ 23 دسمبر (اے پی پی) پاکستان و سعودی عرب تین پہ تینی است خواہی نا غٹ بشخ آتیٹی تعلقداری تے پوسکن آ بڑزی تسکان دننگ نا است خواہی نا درشانی ءِ کرینے، فریق آک ہڑتوم آ برادر ملک آتا نیام اٹ پارلیمانی کمکاری ءِ پین سوگو کننگ نا اہمیت آ ہم زور شاغانو۔ پنچ شنبے نادے آ ایوان صدر نا پریس ونگ آن جاری بیان نا رداٹ صدر مملکت ڈاکٹر عارف علوی تون سعودی عرب شوریٰ کونسل نا ڈل چیئرمین ڈاکٹر عبداللہ محمد بن شیخ ناکماشی ٹی اوڑدہی کرے۔ اوڑدہی ٹی ہڑتوم آ برادر ملک آتا نیام اٹ پارلیمانی کمکاری ءِ پین سوگو کننگ نا اہمیت آ زور شاغنگا۔ صدر مملکت ڈاکٹر عارف علوی پارے کہ پاکستان و سعودی عرب نا نیام اٹ بھلو تاریخی تعلقداری اسے، ہڑتوم آ کنڈآتا زبردست کمکاری ءِ فریق آتا تین پہ تینی فائدہ کن پین مون آ دننگ نا گرج ءِ۔ صدر مملکت مشکل وخت اٹی سعودی عرب نا تاریخی و پدریسہ مخ تفی و پاکستان نا مالی کمک نا ستاءِ کرے۔ صدر مملکت ڈاکٹر عارف علوی سعودی سرکڑدہ غاتے اوغانستان اٹی انسانی حالیت آتیا او آئی سی نا وزرائے خارجہ کونسل نا 17 می بھازاہم دیوان اس بٹنگ انگ نا وخت آ گام آ مبارکبادی تس۔ اواوآئی سی دیوان اٹی جہانی برادری ءِ متحرک کننگ و مالی امداد آ سعودی عرب نا کڑد انا ستاءِ کرساپارے کہ او آئی سی ملک آک مشکل وخت اٹی اوغانستان نا الس ءِ اومیت، سیوت نا سوگو ءُ کلہو اس تس۔ اوپارے کہ اسلامی ملک آک اسلام فوبیا نا چیلنج تون مون تننگ کن اواری اٹ کاریم کیر۔ صدر مملکت مقبوضہ جموں و کشمیر نا کودک مخلوق نا برخلاف کروک آ بھارتی ظلم آتے ہم تالان کرے۔ اوبرادری آ زور شاغا کہ او بھارت آ انسانی حق انا خلاف ورزی تے بند کننگ، سلامتی کونسل نا قرارداد آتا رداٹ حق خودارادیت ترفنگ کن زور شاغے۔ داوخت آ گپ وتران کرسا ڈاکٹر عبداللہ محمد بن شیخ پارے کہ پاکستان ءِ تینا اِرٹمیکو اُرا تکنہ، ہڑتوم آ کنڈآتا تعلقداری تے پین گچین کننگ کن جہانی گام گیج آتا گرج ءِ۔ اوصدر مملکت ءِ شاہ سلمان بن عبدالعزیز السعود و ولی عہد شہزاد محمد بن سلمان نا تہنیتی کلہو ءِ سرکرے۔ اواوغانستان نا بابت وزراء خارجہ کونسل نا 17 می اہم انگا دیوان نا سرسہب اڈتننگ آ صدر مملکت ڈاکٹر عارف علوی ءِ مبارکبادی تس۔
