اسلام آباد۔ 23 دسمبر (اے پی پی) بنجائی وزیر داخلہ شیخ رشید احمد پارینے کہ حکومت مسیحی برادری تون اوار اقلیت آتے مون تروک غٹ ویل آتے ایسر کننگ کن سنبرینگوک ءِ، مسیحی برادری نا آبادکاری کن کاریم کننگ والا اُن، سیالکوٹ کون آ واقعہ غاتیان ملکی دروشم ءِ نسخان رسینگک، ننا غٹ مذہب و فرقہ غاتون گچین تعلقداری ءِ۔ نالہ لئی و راولپنڈی رنگ روڈ ڈٹ آتا منظوری آ وزیراعظم و وزیراعلیٰ پنجاب نا منت وار اُن۔ داخیال آتا درشانی ءِ او پنچ شنبے نادے آ سی ڈی اے ہیڈکوارٹر اٹی کرسمس نا دود آن بطور مہمان خاص تران کرسا کرے۔ بنجائی وزیر پارے کہ کرسچن کمیونٹی نا ہنکینی ویل آتا ایسر کننگ کن کوشست کیوہ، مسیحی برادری کن کالونی جوڑ کینہ، اوپارے کہ مسیحی برادری نا ویل آتے ایسر کینہ و اوفتیکن آبادکاری کن کاریم کننگ والااُن۔ وزیرداخلہ پارے کہ سیالکوٹ واقعہ غان ملکی بدنامی مس و داواقعہ غان پاکستان نا دنیا ءِ غلط کلہو ہنا، پاکستان امن پسند ملک اسے داڑے غٹ مذہب آتے مذہبی آجوئی دوئی ءِ و غٹ مذہب آتا اسہ ایلو تون گچین تعلقداری ءِ۔ اوپارے کہ کرسمس نا وخت آ اگہ مسیحی ملازم اسے 25 دسمبر اسکان تنخواہ رسینگتو تو او تینٹ اونا نوٹس ءِ ہلیک۔ اوپارے کہ نالہ لئی ایکسپریس وے ، رنگ روڈ و ہسپتال کن ارب آ روپئی نا منظوری آ وزیراعظم عمران خان، عثمان بزدار و ایکنک نا منت واری ءِ ہرفنہ۔ اوپارے کہ تینا 26 سالہ دور سیاست اٹ نالہ لئی ایکسپریس وے نا ڈٹ 11 ارب آن 105 ارب روپئی اسکان سرمسنے۔ نالہ لئی ڈٹ آن پد تینا سیاست نا ہم فیصلہ ءِ کیوہ۔ اوپارے کہ سیاسی ورکراسے اُٹ و ای مذہب آتا سرکڑدہ غاتا است اٹ شرف ءِ کیوہ۔ بنجائی وزیر مسیحی برادری ءِ کرسمس نا وخت آمبارکبادی ہم تس۔ بنجائی وزیر سی ڈی اے ٹی عارضی وڑاٹ کاریم کروک آ مسیحی برادری ءِ ریگولر کرفنگ نا پڑو ہم کرے و پارے کہ دافتا بورڈ ہم منظوری ءِ تسنے و ہرافک سلیسونو اوفتیا ہم مسیحی برادری ءِ میرٹ آ کانودی خواست آتے پورو کرسا تخنہ۔
