لاہور۔ 23 دسمبر (اے پی پی) بنجائی وزیر حوالکاری و شینکاری چوہدری فواد حسین پارینے کہ مریم نواز خیبرپختونخوا ٹی تینا شکست نا جشن ءِ کننگ ءِ، نواز و زرداری کون آ مخلوق وام ہلسا ملکی زرگزران نا بیڑہ ءِ غرق کریر، ننے پنچ سال اٹی اوفتا ہلوک آ 55 ارب ڈالر وام تے پدی تروئی ءِ۔ زرداری ءِ ہراتم عدالت آ ہنوئی تمک تو او وہیل چیئر ءِ خواہک، ضمانت ملنگ آن پد دا تینا قدآن بھلو ہیت کننگ نا بناءِ کیک۔ آصف زرداری پیپلزپارٹی نا ہموحالیت ءِ کرینے کہ اینو پیپلزپارٹی تون پنجاب اٹی گچین کاری اومیتدار ہی اف۔ داجماعت آک بیرہ میڈیا نا سیبو آ زندہ ءُ، پاکستان نا عمومی زرگزران شونداری نا کنڈآ ہِننگ ءِ۔ پنچ شنبے نادے آ داڑے میڈیا تون گپ وتران کرسا بنجائی وزیر حوالکاری پارے کہ ننے گچین کاری تے آخا قوم ءِ ہُننگ نا گرج ءِ، مستین اٹ منگلا و تربیلا ڈیم تیان بیدس پین ڈیم تا تفنگ آ ہچ ءُ چکار اس کننگتو، نن ڈیم تا تفنگ آ کاریم نا بناءِ کرین، ڈیم تا تفنگ آن دیر انا کوڑی تیٹی گچینی بریک۔ اوپارے کہ داوخت آ ملک اٹی اِرا لکھ کمپنی ساڑی ءُ، اسہ لکھ 57 ہزار کمپنی بیرہ تدوک آ دونیم سال اٹی جوڑ مسنو۔ بنجائی وزیر حوالکاری پارے کہ کشاری بشخ آ نن چکار تخان، ننا پنچ بھلا فصل آتا بمپر پیدوار مس، برنج، خولم، مکئی نا تاریخی پیدوار مس، کاٹن نا پیدوار اٹی 44 درسد ودکی مس، موٹرسائیکل، کشاری دوائی تا ریکارڈ بہامننگ ءِ۔ بنجائی وزیر حوالکاری پارے کہ ننے پنچ سال اٹی 55 ارب ڈالر نا وام تےپدی تروئی ءِ، نواز شریف و زرداری کون آ مخلوق وام ہلسا ملکی زرگزران نا بیڑہ ءِ غرق کریر، اوفتا ہلوک آ وام تے نن پدی تننگ اُن۔ چوہدری فواد حسین پارے کہ ن لیگ و پیپلزپارٹی نا خیبرپختونخوا نا بلدیاتی گچین کاری تیٹی صفایا مسنے، مریم نواز تینا کارندہ غاتیا ہنسا اوفتے حوصلہ بایدے ایتوسس ولے او خیبرپختونخوا ٹی تینا شکست نا جشن ءِ کننگ ءِ۔ اوپارے کہ ننا مقابلہ سیاسی بون آتون ءِ ، ہراتم زرداری ءِ عدالت آ ہنوئی تمک تو او وہیل چیئر ءِ خواہفک و معذور آتا گاڈی تیا ہِننگ و بننگ نا بناءِ کیک و ہراتم اودے ضمانت ملک تو او تینا قدر آن بھلو ہیت کیک، زرداری پیپلزپارٹی نا او حالیت ءِ کرینے کہ اینو پیپلزپارٹی تون پنجاب اٹی گچین کاری اومیتدار ہی اف، دا جماعت آک داسہ ٹی وی چینل آتا سیبو آ زندہ ءُ، اوفتا کوریج بند مریک تو دا فارغ مریر۔ اوفتا سیاست داسہ کبینی آ پروپیگنڈا کننگ کن سلیسونے۔ بنجائی وزیر حوالکاری پارے کہ پیپلزپارٹی سی سال آن سندھ اٹی برسر اقتدار ءِ و آصف زرداری داسہ سندھ اکن پلان اس اتنگ کن سجفنگ ءِ۔ اوپارے کہ دافک لاہورو اسلام آباد نا چکر اٹ لاڑکانہ و نواب شاہ غا ہِننگ کن ہم سلتنو۔ اوپارے کہ نواز شریف و زرداری ءِ تینا ایلو زند ءِ پیشن نا ملک آتیٹی گدریفوئی ءِ۔ بنجائی وزیر حوالکاری پارے کہ پاکستان دنیا نا ہفت می ایٹمی طاقت ءِ، اوورسیز پاکستانی تا تینا وطن کن جوزہ ستاکڑزک۔ وزیراعظم عمران خان نا کماشی ٹی پاکستان اسہ سوگو ءُ ملک اس جوڑ مننگ والا ءِ، پاکستان نا عمومی زرگزران شونداری نا کنڈآ ہِننگ ءِ۔
