اسلام آباد۔ 23 دسمبر (اے پی پی) چیئرمین سینیٹ محمد صادق سنجرانی پارینے کہ پاکستان اٹی زرکاری کن چاگڑد رکھ و سازگار ءِ ہراڑآن سعودی عرب نا زرکار آک فائدہ ہرفنگ کیرہ، ہڑتوم آ کنڈآتا واپاری تعلقداری تے پین مون آ دننگ نا گرج ءِ۔ سینیٹ سیکرٹریٹ نا رداٹ داہیت ءِ او سعودی مجلس شوریٰ کونسل نا چیئرمین ڈاکٹر عبداللہ بن محمد آل شیخ نا کماشی ٹی بڑزکو اختیاراتی ڈل اتون گپ وتران کرسا پارے ہرا پنچ شنبے نادے آ داڑے چیئرمین سینیٹ تون اوڑدہی کرے۔ اوڑدہی ٹی ہڑتوم آ برادر ملک آتا نیام اٹ ہڑتوم آ کنڈآتا تعلقداری تا مون آ دننگ و غٹ بشخ آتیٹی پین کمکاری ءِ ودفنگ تون اوار تین پہ تینی است خواہی نا امور آ گپ وتران کننگا۔ سعودی عرب و پاکستان اٹی پارلیمانی رابطہ غاتا مون آ دننگ تون اوار ایلو تین پہ تینی است خواہی نا امور آ ہم گپ وتران کننگا۔ چیئرمین سینیٹ مہمان ءِ اوغانستان ناحالیت و ہموجاگہ نا مخلوق ءِ تنکی آن بچفنگ کن کروک آ گام گیج آتیان معلومدار کرے۔ محمد صادق سنجرانی سعودی عرب و کنگ سلمان ریلیف سینٹر نا کنڈآن اوغانی الس نا امداد آ منت واری ءِ ہرفے۔ چیئرمین سینیٹ پارے کہ سعودی عرب ہرمشکل وخت اٹی پاکستان نا کمک ءِ کرینے ہراستاکڑزک۔ ہڑتوم آ راہشون تا نیام اٹ ہڑتوم آ کنڈآتا تعلقداری و کمکاری نا مون آ دننگ آ سرجم گپ وتران کریر۔ سعودی مجلس شوریٰ کونسل جے چیئرمین پارے کہ خادم الحرمین الشریفین و سعودی الس پاکستان تون ہمدردی تخک۔ چیئرمین سینیٹ سعودی عرب نا عالم اسلام ءِ یکجا کننگ اٹ گچین کڑد انا ہم ستاءِ کرے۔ سعودی عرب مجلس شوریٰ کونسل نا چیئرمین پوسکن آ پارلیمانی سال انا بنائی دود اٹی بشخ ہلنگ کن چیئرمین سینیٹ ءِ سلہ خلک ہرا دے او امنا کرے۔ چیئرمین سینیٹ مہمان نا ناسازی طب آن پد ہم پاکستان آ بننگ آ منت واری ءِ ہرفے۔ چیئرمین سعودی مجلس شوریٰ کونسل پارے کہ ہڑتوم آ ملک آتا نیام اٹ ڈل آتا ہن و بر آن تعلقداری پین سوگو مسنے۔ سعودی مہمان ہڑتوم آ ملک آتے خڑک اتنگ اٹ چیئرمین سینیٹ نا کوشست آتا ستاءِ کرے۔ محمد صادق سنجرانی پارے کہ سوگو تین پہ تینی تعلقداری آن مچ آ عالم اسلام سوگو مریک، پاکستانی حکومت آن بیدس پاکستانی الس ہم سعودی عرب تون گچین تعلقداری ءِ برجاتخنگ نا خواہندار ءِ۔ اوڑدہی ٹی ہڑتوم آ ملک آتا نیام اٹ ڈل آتا ہن و برنا چرجوئی ءِ برجاتخنگ آ ہم زور شاغنگا۔ چیئرمین سعودی مجلس شوریٰ کونسل پارے کہ پاکستانی ڈل سعودی عرب نا پوسکن آ پارلیمانی سال انا دود اٹی بشخ ہلنگ آن مست سعودی عرب نا دورہ ءِ کیر تانکہ ہڑتوم آ کنڈآتا تعلقداری تے مون آ دننگ کن پبی لائحہ عمل اس مون آ اتنگے۔چیئرمین سینیٹ پارے کہ سعودی عرب مدام پاکستان نامشکل حالیت آتیٹی کمک ءِ کرینے۔ اوپاکستان نا کمک آ خادم حرمین شریفین و شہزاد محمد بن سلمان نا منت واری ءِ ہرفے۔ چیئرمین سینیٹ سعودی عرب، خادم حرمین شریفین و محمد بن سلمان کن نیک است خواہی تا درشانی ءِکرے۔ چیئرمین سینیٹ سعودی عرب نا بزنس مین و زرکارآتے پاکستان اٹ زرکاری نا وارخواہی تیان فائدہ ہرفنگ آ زور شاغا۔ اوپارے کہ پاکستان اٹی زرکاری کن چاگڑد رکھ و سازگار ءِ ہراڑآن سعودی عرب نا زرکارآک فائدہ ہرفنگ کیرہ، ہڑتوم آ کنڈآتا واپاری تعلقداری تے پین مون آدننگ نا گرج ءِ۔ اوپارے کہ سعودی عرب نا ہمسایہ ملک آتون تعلقداری گچین مسنے ہراڑآ خوشی ءِ۔ اوپارے کہ قطر انا الس ہم سعودی عرب تون گچین تعلقداری استوار مننگ آ خوش ءِ و خادم حرمین شریفین نا دا مخلصانہ کوشست آتیا اوفتا منت وار اُٹ۔ صادق سنجرانی پارے کہ او آئی سی نا وزراء خارجہ نا دیوان نا سرسہب اڈتننگ اٹ سعودی عرب نا کڑد ستاکڑزک۔ اوڑدہی ٹی چیئرمین سینیٹ تون اوار سینیٹرز حافظ عبدالکریم، نصیب اللہ بازئی، فیض محمد، فیصل سلیم و سیکرٹری سینیٹ محمد قاسم صمد خان ئسک ہم ساڑی ئسر۔
