اسلام آباد۔ 23 دسمبر (اے پی پی) پاکستان وجہانی بینک بجلی نا بشخنگ اٹ گچینی کن 195 ملین ڈالر مالیت نا معاہدہ غاتیا دستخط کریر۔ اقتصادی امور ڈویژن نا سیکرٹری میاں اسدحیاء الدین تقسیم کار کمپنی حیسکو، میپکو و پیسکو نا نمائندہ غاک وخت اس کہ جہانی بینک انا آپریشنز مینجر انجم احمد بینک انا کنڈآن معاہدہ غاتیا دستخط کریر۔ دا ڈٹ انا بنداوی مسخت حیدرآباد الیکٹرک سپلائی کمپنی (حیسکو) ، ملتان الیکٹرک پاور کمپنی (میپکو) و پشاور الیکٹرک سپلائی کمپنی (پیسکو) نا ہدف والا علاقہ غاتیٹی آپریشنل کارکڑد ءِ گچین کننگ و پون بجلی نا بشخ اٹی اصلاحات نا ایجنڈاآ پیش رفت ءِ۔ داڈٹ آن پاور ڈویژن ءِ نیشنل الیکٹریسٹی پالیسی 2021 نا رداٹ تینا مینڈیٹ آ عملدرآمد و بجلی نا بشخ اٹی اصلاحات نا نفاذ اٹی کمک رسینگک۔ ترجمان نا رداٹ صارف آتا گچین خذمت کن گچین نظم و نسق ، تکنیکی لائخی تیٹی ودکی، رکھی گام گیج و واپاری کارکڑد ءِ گچین کننگ دا ڈٹ انا خاص مسخت ءِ۔ ڈٹ وزارت توانائی (پاور ڈویژن) ءِ بجلی نا بشخ اٹی اصلاحات نا نفاذ، اونا چاروکی و ڈسکوز نا بست وبند اٹی نجی شریداری ءِ ودفنگ اٹ کمک فراوان کیک۔ داکان بیدس ڈٹ آن کاروباری ، صنعتی و کشاری صارف آتے بجلی نا فراوانی ٹی گچینی اتنگک، سرسوز و شاداب پاکستان نا ہدف آک ہم دا ڈٹ انا اہم ءُ بشخ ءُ۔ اقتصادی امور ڈویژن نا سیکرٹری جامع و پائیدار اقتصادی شونداری ءِ مون آ دنگن کن ساڑی حکومت ءِ پدریسہ کمک فراوان کننگ آ جہانی بینک انا انتظامیہ نا منت واری ءِ ہرفے۔ اوپارے کہ ملکی زرگزران ءِ سوگو کننگ کن مشکل حالیت آتیان پد ہم پاکستان نا حکومت پنجرجاتی اصلاحات نا نفاذ آ تینا چکار ءِ تخانے۔ اواصلاحات نا نفاذ ءِ پین سوگوی تننگ نا حکومتی عزم انا درشانی ءِ کرے وپارے کہ بجلی نا بشخ اٹی جامع اصلاحات ننا اولیت ءِ۔
