اقوام متحدہ۔ 23 دسمبر (اے پی پی) اقوام متحدہ ٹی پاکستان نا آخبتی مندوب منیر اکرم جنگ و جہانی پابندی تا سوب آن اقتصادی بھسکاری نا دنگ آ سرمروک آ ملک اوغانستان نا انسانی ہمدردی نا بنداو آ امداد کن قرارداد نا منظوری نا خیرمقدم ءِ کرسا پیدوار کرے کہ قرارداد پیدوار وڑاٹ جہانی کانودی حیثیت ءِ پک کیک کہ اوغان الس ءِ انسانی امداد سلامتی کونسل نا پابندی تا شق آتا خلاف ورزی اف۔ اوتدوک آ دے اقوام متحدہ نا سلامتی کونسل نا قرارداد پیش کننگ آ امریکہ و قرارداد اٹی گچینی اتنگ آ چین و روس انا منت واری ءِ ہرفے۔ اوپیدوار کرے کہ سلامتی کونسل نا قرارداد ترمیم یا پابندی تا نظام آن استثنیٰ اف۔ اواست ہسونی نا درشانیءِ کرسا پارے کہ کونسل نا گڑاس باسک داسہ ہم سیاسی آسودہی دوئی کننگ کن اوغان الس نا انسانی و اقتصادی کمک ءِ کاریم اٹ اتنگ خواہک ہرا اوغان قوم انا است ہسون مشکل آتا بارواٹ است ہسونی بے حسی اسے۔ اوپارے کہ ننے اومیت ءِ کہ دا قرارداد نامنظوری آن جہانی برادری، باسک ریاست، اقوام متحدہ نا ادارہ، آسودہی تنظیمک کانودی اڑاند آتا پرواہ ءِ کپرسا اوغان الس ءِ غٹ ممکنہ امداد فراوان کیرہ۔ پاکستان نا آخبتی مندوب منیر اکرم اوغان الس نا کمک کن اوفتے انسانی ہمدردی نا بنداو آ المی امداد نا فراوانی ءِ متحرک کننگ آ سیکرٹری جنرل انتونیوگوتریش نا کماشی نا ستاءِ کرے۔ دانا شڑت آتا رداٹ قرارداد اٹی پاننگاکہ فنڈ انا پروسیسنگ و زرتس، ایلو مالی امداد یا اقتصادی وسیلہ و داوڑناامداد نا وخت آ فراوانی ءِ پک کننگ یا داوڑنا سرجزآتا مخ تفی کن المی گڑاو خذمت آتا فراوانی نا موکل ءِ۔ سلامتی کونسل ناقرارداد اٹی پاننگانے کہ دا قرارداد اقوام متحدہ نا سلامتی کونسل نا طالبان تا فہرست اٹ اوار باسک و اوڑتون منسلک ادارہ غاتا میرات آتے منجمد کننگ آن استثنیٰ فراوان کیک، بیرہ انسانی امداد نا فراوانی و اوغانستان اٹی بنداوی انسانی گرج آتے پورو کروک آ ایلو سرجزآتیکن ہرانا کونسل اسہ سال اٹی جاچ ءِ ہلیک۔ قرارداد نا شڑت آتا رداٹ سلامتی کونسل اسہ سال آن پد قرارداد آ عملدرآمد ءِ پک کننگ نا جاچ ءِ ہلنگ نافیصلہ کرے و ایمرجنسی ریلیف کوآرڈنیٹر آن خواست کرے کہ او اوغانستان اٹی امداد نا فراوانی آ تینا باسک آتے ہر 6 تُو آن پد حوال ایتک ۔ کونسل درخواست کرے کہ ایمرجنسی ریلیف کوآرڈنیٹر ءِ امداد فراوان کروک آ ملک آک 60 دے انا تہہ ٹی تروک آ ہروڑنا امداد یا کمکی سرگرمی تا بارواٹ تعلقدار معلومداری تیا مبنی حوال تیار کننگ اٹ کمک کیک۔ سلامتی کونسل غٹ فریق آتیا زور شاغا کہ او جہانی انسانی قاننو نا رداٹ تینا زمواری تے پورو کرسا انسانی حق انا شرف ءِ کیر و خواست کرے کہ او امداد نا فراوانی ٹی اقوام متحدہ نا کارندہ غاتے صنفی امتیاز آن بیدس بے اڑانگ، رکھ و پورو رسینگ نا موکل ایتر۔
