اسلام آباد۔ 22 دسمبر (اے پی پی) پاکستان و ایشیائی شونداری بینک توانائی نا بشخ اٹی اصلاحات ، راجی رکھ ، شاری بنداوی پنجر نا تفنگ، شاہرات و آبی وسیلہ غاتیٹی کمکاری کن اسہ ارب، 54 کروڑ 30 لکھ ڈالر نا شش مالیاتی معاہدہ غاتیا دستخط کریر۔ اقتصادی امور ڈویژن نا سیکرٹری میاں اسد حیاء الدین و ایشیائی شونداری بینک انا کنٹری ڈائریکٹر یانگ یی مالیاتی کمکاری نا دا معاہدہ غاتیا دستخط کریر۔ بنجائی وزیر اقتصادی امور عمرایوب خان ئسک ہم داوخت آ ساڑی ئسر۔ دامعاہدہ غاتیٹی پاکستان نا توانائی نا بشخ ءِ سوگو کننگ کن مالیاتی، تکنیکی و گورننس اصلاحات اٹی کمک کن 300 ملین امریکی ڈالر نا پالیسی آ مبنی وامک اوار ءُ۔ ہرامعاہدہ غاتیا دستخط کننگانے اوفتے ٹی خیبرپختونخوا نا پنچ شارتیٹی شاری بنداوی پنجر ءِ گچین کننگ کن 385 ملین ڈالر نا فنانسنگ معاہدہ، انڈس ہائی وے نا 222 کلومیٹر مریس شکارپور۔راجن پور سیکشن ءِ دورویہ کننگ کن 235 ملین امریکی ڈالر نا پروجیکٹ لون، احساس پروگرام ءِ سوگوی و ودفنگ کن 603 ملین امریکی ڈالر نا نتیجہ غاتیا مبنی وام پروگرام، کرم تنگی انٹیگریٹڈ واٹر ریسورسز ڈویلپمنٹ پروجیکٹ کن پنچ ملین ڈالر نا معاہدہ و خیبرپختونخواسٹیز امپروومنٹ انویسٹمنٹ پروجیکٹ فیز(II 15ملین امریکی ڈالر نا تیاری کن اِرا پروجیکٹ ریڈی ینس فیسلیٹیز نا معاہدہ اوار ءُ۔ بنجائی وزیر عمرایوب خان توانائی نا بشخ اٹی اصلاحات، سڑک آتا نیٹ ورک ءِ گچین کننگ و راجی رکھ ءِ ودفنگ کن پدریسہ کمکاری آ ربینک انا صدر، سینئر مینجمنٹ و بینک انا بورڈ آف ڈائریکٹر ز نا منت واری ءِ ہرفے۔ اوپارے کہ 385 ملین ڈالر نا کمکاری آن خیبرپختونخوا سٹیز امپروومنٹ پروجیکٹ نا رداٹ ایبٹ آباد، کوہاٹ، مردان، مینگورہ و پشاور اٹی دیر انا فراوانی نا کمک اٹ رہینگ نالائخی ءِ گچین کننگ اٹ صوبائی و ہندی حکومت آتے کمک رسینگک۔ داکمکاری آن سیوریج، سالڈ ویسٹ مینجمنٹ و گرین انفراسٹرکچر نارداٹ میونسپل کمپنی تا خذمت آتا فراوانی و کارکڑد ءِ گچین کننگ کن ادارہ جاتی کمکاری ہم فراوان کیک، ڈٹ آن خیبرپختونخوا نا پنچ شار تیٹی 35 لکھ بندغ فائدہ ہرفرہ۔ بنجائی وزیر پارے کہ دا ڈٹ حکومت نا شونداری اولیت و وزیراعظم عمران خان نا کلین گرین پاکستان نا وژن نا عکاسی ءِ کیک۔ اوپارے کہ نیامی ایشیاعلاقائی اقتصادی کمکاری (کاریک) کوریڈور ڈویلپمنٹ انویسٹمنٹ پروگرام نا رداٹ 235 ملین ڈالر نا ارٹ میکو قسط انا رداٹ انڈس ہائی وے نا 222 کلومیٹر مریس شکارپور۔راجن پور سیکشن ءِ دورویہ کننگک۔ چار لین کیریج وے کندھ کوٹ، کشمور و روجھان نا کسر دریائے سندھ انا دیکی کنارہ غا سندھ و پنجاب نا صوبہ غاتیان گدرینگک۔ داڈٹ آن نئے بیرہ ہندی اقتصادی سرجزآتے مون آ دننگک بلکن گچین رابطہ و کم سفری وخت انا کمک اٹ علاقائی واپار و مخلوق نا ہن و بر اٹ آسانی مریک۔ انڈس ہائی وے اسہپین جہانی راہداری اسے ہرا چین، اوغانستان و اونا ہمسایہ نیامی ایشیائی ملک آتے بحیرہ عرب تون ملفک۔ سڑک آتا کاریم اٹ اتوک آتا آرام و رکھ ءِ پک کننگ کن دابشخ ءِ بس شیلٹرز، ٹراما سینٹر ز و ریسٹ ایریاتون اوار اوار روڈ سیفٹی آسراتی آن شپ کننگک۔ عمرایوب خان پارے کہ انٹیگریٹڈ سوشل پروٹیکشن ڈویلپمنٹ پروگرام وزیراعظم پاکستان عمران خان نا وژن نا رداٹ راجی رکھ و نیزگاری ٹی کمتی نا اسکیم آتون اوار اوار احساس پروگرام نا نفاذ کن حکومت نا کوشست آتا عکاسی ءِ کننگ ءِ۔ اوپارے کہ کرم تنگی انٹیگریٹڈ آبی وسیلہ غاتا شونداری نا ڈٹ مسکوہی فاٹا ٹی اولیتی ڈٹ آتیان اسٹ ءِ، ڈٹ انا رداٹ دیر کوڑی کننگ نا آسراتی تون اسہ ڈیم اسے نا تفنگ، پن بجلی نا پیدوار و 140،000 ایکڑ آ تالان آبپاشی نا نظام نا گچینی دادٹ انا بشخ ءِ ہراڑآن نئے بیرہ کشاری پیدوار اٹی ودکی مریک بلکن روزگار نا وارخواہی و خلقی علاقہ غاتیٹی نیزگاری ءِ کم کننگ اٹ کمک رسینگک۔
