اسلام آباد۔ 22 دسمبر (اے پی پی) وزیرخارجہ مخدوم شاہ محمود قریشی پارینے کہ اینو پاکستان تینا گچین سفارت کاری نا سوب آن مچ آ دنیا نا مرکز جوڑ مسنے۔ او داہیت ءِ چارشنبے نادے آ وزیرحوالکاری و شینکاری چوہدری فواد حسین، وزیر مملکت حوالکاری فرخ حبیب و وزارت حوالکاری نا سینئر آفیسر آتا شرفمندی اٹ وزارت خارجہ ٹی کروک آ چاہ انا بست وبند نا وخت آ پارے۔ داوخت آ وزیراعظم نا خصوصی کمکار علامہ طاہر اشرفی، اسپیشل سیکرٹری خارجہ رضابشیر تارڑ، سیکرٹری حوالکاری شاھیرہ شاہد، پی آئی او سہیل علی خان، ڈائریکٹر جنرل ایکسٹرنل پبلسٹی عنبرین خان، ایم ڈی اے پی پی مبشر حسن، ایم ڈی پی ٹی وی عامر منظور، ایگزیکٹو پروڈیوسر عون ساہی، وزیراعظم نا فوکل پرسن ڈیجیٹل میڈیا ڈاکٹر ارسلان خالد، جی ایم ڈیجیٹل میڈیا ونگ عمران غزالی و وزارت خارجہ نا سینئر آفیسر آک ہم ساڑی ئسر۔ وزیرخارجہ 19 دسمبر آ او آئی سی نا وزرائے خارجہ کونسل نا اہم انگا دیوان و اونا گرج و مسخت آتا پاکستان تون اوار مچ آ دنیا ٹی گچین پیش کننگ آ وزیرحوالکاری چوہدری فوادحسین و اونا مچ آ ٹیم ءِ مبارکبادی پیش کرے و اوفتا خذمت آتا ستاءِ کرے۔ اوپارے کہ اللہ رب العزت وزیراعظم عمران خان نا کماشی ٹی پاکستان ءِ اسہ تاریخی، سفارتی سرسہبی اس تس۔ اوغانستان نا بابت اڈ ہلوک او آئی سی نا وزرائے خارجہ کونسل نا اہم انگا دیوان نا جہانی کہول آ ستاءِ کننگ انگ ءِ و اینو پاکستان تینا گچین سفارتکاری نا سوب آن مچ آ دنیانا مرکز جوڑ مسنے۔ شاہ محمود قریشی پارے کہ پاکستان مارچ 2022 اٹی او آئی سی نا وزرائے خارجہ کونسل نا چل و ہشت می دیوان نا مہمانداری کن ہم سنبرینگوک ءِ۔
