اسلام آباد۔ 22 دسمبر (اے پی پی) پبلک اکاؤنٹس کمیٹی نا دیوان چارشنبے نادے آ پارلیمنٹ ہاؤس اٹی پی اے سی نا چیئرمین رانا تنویر حسین نا کماشی ٹی مس۔ دیوان اٹی کمیٹی نا باسک سینیٹر طلحہ محمود، نور عالم خان، سید حسین طارق، منزہ حسن، سید نوید قمر، راجہ ریاض احمد، حناربانی کھر، شیخ روحیل اصغر، خواجہ شیراز محمود، خواجہ آصف، تون اوار تعلقدار سرکاری ادارہ غاتا آفیسر آک بشخ ہلکر۔ دیوان اٹی وزارت قومی جان جوڑی و خذمت، این ڈی ایم اے و یوٹیلیٹی اسٹورز کارپوریشن نا 2020-21نا آڈٹ اعتراض آتا جاچ ءِ ہلنگا۔ دیوان نا بناٹی چیئرمین پی اے سی رانا تنویر حسین پارے کہ کورونا دین اتون مون تننگ کن 1200 ارب روپئی جتا کننگا ولے اوفتیان یوٹیلیٹی اسٹورز، ایف بی آر و این ڈی ایم اے ءِ تننگا۔ آڈٹ 40 ارب روپئی نا بے وڈولی تا پیدواری ءِکرے۔ وزارت خزانہ کل 1240 ارب جتا کننگا ہرافتیان 190 ارب ایمرجنسی، 570 ارب شاری تے ریلیف ، کاروباری بشخ انا ریلیف کن ایف بی آر ءِ 480 ارب و اینخو سال کورونا ویکسین کن 352 ارب روپئی تخنگا۔ دافتیان 875 ارب کیش وخت اس کہ 365 ارب نا نان کیش آئٹمز ئسر۔ حنا ربانی کھر پارے کہ اخس زر جتا کننگا اوفتیان ہم مچ آ زر ءِ ریلیز کننگتو۔ چیئرمین کمیٹی پارے کہ پیشن آن جان جوڑی نا آسراتی و نظام نا اپ گریڈیشن کن ہرا زر ملا اوہرانگ ہنار۔ ہرا مسخت کن زر ملانے اودانگ اینگ مفس۔ طلحہ محمود پارے کہ ویکسین ننے عطیہ نا وڑاٹ ہم ملا۔ سیکرٹری خزانہ عامر یعقوب شیخ پارے کہ کورونا دین اٹی پیشن آن 2.636 ارب ڈالر بجڑی سپورٹ کن فراوان کننگا۔ بجٹ کن ہرازر ملا او پول اٹ ہنار۔ دا زر ننے آئی ایم ایف، ایشیائی شونداری بینک و ورلڈ بینک آن تننگار۔ دافتیان 1.3 ارب ڈالر آئی ایم ایف آن ملا۔ پی اے سی پارے کہ دا مچ آ زر انا سرجم آتے فراوان کننگے و اقتصادی امور ڈویژن ءِ ہم بٹنگ انگے۔ چیئرمین پی اے سی داسرجم آتیا است جم مفننگ نا درشانی ءِ کرسا سیکرٹری خزانہ ءِ پارت کرے کہ او پورو تیاری کرسا برے و ہرا ہرا مدآتیٹی زر خڑچ کننگانے و ہراہراکان زر بسنے اوفتا پورو سرجم آتے فراوان کننگے۔ آڈٹ کمامدارآک پاریر کہ 500 ارب روپئی شاری تے ریلیف تننگ کن وزیراعظم نا سٹیمولس پیکج آن ضمنی گرانٹ نا پڑو کننگا ہراٹی 200 ارب ڈیلی ویجرز، نیزگار شاری تا امداد کن 150 ارب، یوٹیلیٹی اسٹور آتیکن 50 ارب، بجلی و گیس انا سبسڈی کن 100 ارب جتا مس ولے دافتیان بیرہ 186 ارب روپئی جاری مس وخت اس کہ 314 ارب روپئی جاری متو۔ سیکرٹری صنعت و پیدوار جواد رفیق ملک پارے کہ کورونا دین انا وخت بھاز خراب حالیت آک ئسر، صنعت آتا بند مننگ آن بے روزگاری عروج آ ئس۔ خواجہ شیراز محمود پارے کہ اودے وخت ایتے تانکہ زر ریلیز کپننگ نا پیدوار ءُ توجیح اس پیش کننگ کے۔ پی اے سی نا باسک آک پاریر کہ کورونا دین انا حالیت آتیٹی 1240ارب نا پیکج جتا و 500 ارب نا جتا معاملہ ءِ۔ وزارت خزانہ و اقتصادی امور ڈویژن ہڑتوم آ ک پی اے سی ءِ است جم کیر۔
