اسلام آباد۔ 22 دسمبر (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ ننابھاز انگا چناک غذائی کاختی نا گواچی ءُ، گیشتر ناجوڑی تا تعلق ننا خور اتون ءِ ہرانا سوب آن کم علمی ءِ۔ داخیال آتا درشانی ءِ او چارشنبے نادے آ ہیلتھ سروسز اکیڈمی ٹی پوسٹ گریجویٹ ڈپلومہ نا بنائی دود آن تران کرسا کرے۔ خصوصی کمکار پارے کہ بھاز انگا گڑاک ریسرچ آن پد معلوم مریک ولے ننے ہر فیصلہ ءِ کننگ کن جہانی ریسرچ ءِ مون آ تخوئی تمک۔ ڈینگی و ملیریانا بابت دا ٹریننگ بھاز کاریمی مریک۔ اوپارے کہ او غٹ ناجوڑی اوفتا بارواٹ ریسرچ کننگ بھاز المی ءِ تانکہ اوفتا تالانی ءِ توننگ مرے۔ غذائیت نا بابت اوپارے کہ نناداڑے داسہ ہم غذائی کاختی ساڑی ءِ ہرانا تعلق غذانا کمتی تون آخا بلکن کم علمی ءِ۔ غذائی کاختی نا چناک ذہنی و جونی وڑاٹ نزور مریرہ، اوفتا نشوونما سہی وڑاٹ مفک و کیہی چناتا قد ہم چنک سلک۔ گیشتر ناجوڑی تا تعلق ننا خور اتون ءِ۔ اوپارے کہ داہم مون آ بسنے کہ بھاز انگا ناجوڑی تا تعلق ننا زند انا وڑاتون ہم ارے کہ نن انت کنینہ، رہینگنہ و نن تینا جان جوڑی نا امر خیال ءِ تخنہ، نن ہراخور آتے کُننگ اُن اوفتا بارواٹ ننے اخس سماءِ۔ ننا راج انا ہمو بشخ ہرا نیزگار اف ہموڑے ہم اسہ تناسب غذائی کاختی ساڑی ءِ۔ہیلتھ سروس اکیڈمی ٹی 350 نا خڑک طالب علم ءُ و داکچ زوت 500 اسکان سرمریک۔ ہیلتھ سروس اکیڈمی داطالب علم آتیکن آسانی ودی کننگ نا کوشست کرینے تانکہ طالب علم آتا ویل آتے گچین وڑاٹ ایسر کننگ مرے۔ ہمو غٹ یونیورسٹیک ہرا ڈگری تننگ ءُ اوفتیا لازم ءِ کہ او تینکن وسیلہ ودی کیر۔ داخہ خوانوک ءُ مخلوق ارے اوفتیان ہم فائدہ ہرفنگے۔ اوپارے کہ نن ہیلتھ سروسز اکیڈمی و ہمو غٹ ادارہ غاک ہرا خوانفنگ نا کاریم ءِ کننگ ءُ ننا کوشست ءِ کہ او بیرہ ڈگری تفس بلکن آب اٹ تعلیم ایتر ہراڑآن نئے بیرہ ہمو بندغ فائدہ ہرفے بلکن اونا دامون ایمون رہینگوک آک ہم اونا تعلیم آن فائدہ ہرفنگ کیر۔ پاکستان میڈیکل کمیشن اٹی ہراتم ریفارمز اتنگا تو بھاز شور مس ولے ہراتم نیشنل لائسنسنگ امتحان نا رزلٹ بس تو غٹ خنار کہ ہمو میڈیکل کالج 100 درسد پاس مسر ہرافک تینا تعلیم نا آب ءِ 100 درسد تخار و ہرا میڈیکل کالج آک تینا تعلیم نا آب ءِ اہمیت تتور اوفک بے سہب مسر۔ ہندا گام گیج داسہ نن ڈرگ ریگولیٹری اتھارٹی ٹی اتنگ اُن، ہنداوڑ قومی ادارہ جان جوڑی و فارمیسی ٹی ہم ریفارمز اتنگ اُن۔
