اسلام آباد۔ 22 دسمبر (اے پی پی) وزیرخارجہ مخدوم شاہ محمو د قریشی پارینے کہ پاکستان ، سارک انا بانی باسک مننگ نا ناطہ ، علاقائی کمک و رابطہ غاتا مون آ دننگ کن سارک انا متحرک و فعال کڑد انا خواہندار ءِ، سارک پلیٹ فارم آن ، دینی حالیت، موسمیاتی بدلی، غذائی رکھ کون آ اسیجائی چیلنج آتون مون تننگ کن جامع و گچین حکمت عملی اس تینا کننگ نا گرج ءِ۔ داہیت ءِ او سویل ایشیائی ملک آتا علاقائی کمکاری نا تنظیم سارک انا سیکرٹری جنرل ایسالارووان ویراکون تون گپ وتران کرسا پارے ہرا چارشنبے نادے آ وزارت خارجہ ٹی اوڑتون اوڑدہی کرے۔ وزیر خارجہ سیکرٹری جنرل سارک اتون سیالکوٹ اٹی سری لنکن شاری تون پیش بروک آ است ہسون واقعہ غا است ہسونی نا درشانی ءِ کرے وپارے کہ نن دا است ہسون واقعہ نا رونما مننگ آن پد سری لنکن حکومت و الس تون ہڑزخواہی کرین۔ شاہ محمود قریشی پارے کہ ننا غٹ بڑزکو سیاسی سرکڑدہ، مذہبی اسکالرز وپاکستانی قوم داواقعہ نا مذمت ءِ کرے۔ وزیرخارجہ سیکرٹری جنرل سارک ءِ باور کرفے کہ حکومت پاکستان دا واقعہ نا زموار آتے اوفتے اوفتا کروک آ سزا ایتک ۔ اوپارے کہ پاکستان، سارک انا بانی باسک مننگ نا ناطہ، علاقائی کمکاری و رابطہ نا مون آ دننگ کن سارک انا متحرک و فعال کڑد انا خواہندار ءِ۔ سارک ممبر ملک آتا نیام اٹ واپاری رابطہ غاتا مون آ دننگ نا بھلو وارخواہی اس ارے ہرافتیان فائدہ ہرفنگ نا گرج ءِ۔ اوپارے کہ پاکستان، جغرافیائی اقتصادی اولیت آتیا چکار کرینے۔ پاکستان، سارک انا ممبر ملک آتا نیام اٹ ڈغاری، ہوائی، و آبی رابطہ غاتے ودفنگ نا مخ تفی ءِ کیک ۔ شاہ محمود قریشی پارے کہ سارک پلیٹ فارم آن ، دینی حالیت، موسمیاتی بدلی ، غذائی رکھ کون آ اسیجائی چیلنج آتون مون تننگ کن جامع و گچین حکمت عملی اس تینا کننگ نا گرج ءِ۔ وزیرخارجہ سارک تنظیم نا مسخت آتا پوروی کن پاکستان نا پورو مخ تفی نا باور کرفے۔
