اسلام آباد۔ 22 دسمبر (اے پی پی) وزیراعظم نا نمائندہ خصوصی بین المذاہب ہم آہنگی و دے ٹکی نیامی امور وپاکستان علماء کونسل نا چیئرمین حافظ محمد طاہر محمود اشرفی و پنی آ مذہبی اسکالر مولانا طارق جمیل چارشنبے نادے آ داڑے سری لنکن ہائی کمشنر موہن وجے وکرماتون اوڑدہی کرسا سانحہ سیالکوٹ آ است ہسونی نا درشانی ءِ کریر وخت اس کہ سری لنکا نا ہائی کمشنر موہن وجے وکرما پارے کہ سری لنکانا حکومت ، حکومت پاکستان نا کنڈآن داچرجوئی ٹی کروک آ گام گیج آتیان پورو وڑاٹ است جم ءِ۔ چارشنبے نادے آ داڑے سری لنکن ہائی کمیشن اٹی اوڑدہی آن پد میڈیا تون گپ وتران کرسا حافظ محمد طاہر محمود اشرفی پارے کہ مولانا طارق جمیل سری لنکن ہائی کمشنر تون سانحہ سیالکوٹ آ است ہسونی نا درشانی ءِ کننگ کن بسنے۔ مولانا طارق جمیل ہائی کمشنر تون اوڑدہی ٹی پارے کہ نن سانحہ سیالکوٹ آ شکی و معذرت خواہ اُن۔ نن سری لنکا نا مخلوق نا ہم منت وار اُن۔ حافظ محمد طاہر محمود اشرفی پارے کہ دا کیس انا بابت پراسیکیوشن باندات بھاز ترندی اٹ مننگ ءِ۔اوپارے کہ ہراتم ای فیکٹری آ ہناٹ تو ہموڑے ساڑی مخلوق کنے پارے کہ مقتول انجینئر ءِ خلنگاکہ تو اوپارے کہ کنے خلپبو ای کلمہ ءِ خوانیوہ، کلمہ ءِ خوانیوہ، ننا دین اٹی ہچ ءُ جبر اس اف، داظلم مسنے و ظالم تینا انجام آ سرمریک۔ داوخت آ گپ وتران کرسا پنی آ طارق جمیل پارے کہ اسلام امن نا کلہو و مریبت نا درس ایتک۔ اوپارے کہ اسلامی رغاموک آتا رداٹ سود کُنوک آ و بے گناہ اسے کسفوک آ ہڑتوم آک غٹ آن زیات سزا نا حقدار مریرہ۔ جہالت نا تہارانگا نن نا تہاری آن ہم زیات تہارمریک۔ اوقوم آن قرآن پاک نا مطالعہ ءِ کننگ نا خواست کرسا پارے کہ قرآن پاک نا ہر زبان اٹ ترجمہ ارے۔ اوپارے کہ تینا خواجہ محمد صلی اللہ علیہ و آلہ وسلم نا سیرت ءِ خوانبو، اونا زند انا بارواٹ خوانبو ہراڑآن ننے روشنائی و رہبری ملک۔
