اسلام آباد۔ 22 دسمبر (اے پی پی) اقوام متحدہ نا ذیلی ادارہ واپار و شونداری (یواین سی ٹی اے ڈی ) پارینے کہ سال 2020نا مقابلہ ٹی 2021اٹی جہانی واپار اٹی 23 درسد ودکی نا گمان ءِ۔ ادارہ نا کنڈآن جاری ساڑی آ رپورٹ نا رداٹ 2021 اٹی جہانی واپار نا کچ ودسا 28 کھرب ڈالر مننگ نا گمان ءِ ہرا 2020نا مقابلہ ٹی 23 درسد اسکان زیات مریک، ولے سال 2022اٹی جہانی واپار اٹی غیر یقینی حالیت آتا گڑتی ءِ۔ رپورٹ اٹی پاننگانے کہ کورونا دین انا جہانی دین آن پد کاروباری پابندی تا چٹنگ آن پد خذمت آتا مقابلہ ٹی مصنوعات آتا خواست اٹی خاطرخواہ ودکی آن جہانی واپار ءِ مون آ دننگ دوئی مسنے، ولے خام مال انا نہاد و سفری خڑچ آتا ودکی نا سوب آن مصنوعات آتا نہاد آتیٹی ودکی نا رجحان ءِ۔ یواین سی ٹی اے نا پاننگ ءِ کہ سال 2021نا ارٹ میکو ششماہی ٹی مصنوعات آتا واپار اٹی نمان حداسکان ودکی مس وخت اس کہ خذمت آتا بشخ انا واپار ہم ودانے، ولے 2019 نا مقابلہ ٹی کم ئسر۔ رپورٹ نا رداٹ سال 2021نا مسٹ میکو سہ ماہی ٹی مصنوعات آتا جہانی واپار 5.6 کھرب ڈالر نا ریکارڈ کہول اسکان سرمس ہرااسہ ریکارڈ اسے، ولے داوخت آ خذمت آتا بشخ انا جہانی واپار نا کچ 1.5 کھرب ڈالر ریکارڈ کننگا۔ جہانی ادارہ 2022 اٹی جہانی واپار نا بابت غیر یقینی حالیت آتا ہم گڑتی ظاہر کرینے۔
