اسلام آباد۔ 22 دسمبر (اے پی پی) صدر مملکت ڈاکٹر عارف علوی پارینے کہ یونیورسٹی خاص وڑاٹ آئی ٹی و انجینئرنگ نا بشخ آتیٹی داخلہ نا کچ ءِ ودفنگ کن کوشست آتے ترند کننگ نا گرج ءِ تانکہ کسبکار گریجویٹس آتا مارکیٹ نا خواست ءِ پورو کننگ مرے، علاقائی ملک آک پاکستان نا مقابلہ ٹی یونیورسٹی تا گریجویٹس آتا بھاز زیات کچ ودی کننگ ءُ و ننا یونیورسٹیک ملک اٹ بیچلرز و ماسٹرز گریجویٹس آتا کچءِ ودفنگ کن آن لائن و فاصلاتی تعلیم نا مون آ دننگ آ چکار تخر۔ صدر مملکت داخیال آتا درشانی ءِ چارشنبے نادے آ داڑے ایوان صدر اٹی بنجائی چارٹر ڈیونیورسٹی و ڈگری تروک آ ادارہ غاتا وائس چانسلرز/ریکٹرز آتا دیوان اٹی کرے۔ بنجائی وزیر فیڈرل ایجوکیشن اینڈ پروفیشنل ٹریننگ شفقت محمود، ایگزیکٹیو ڈائریکٹر ہائر ایجوکیشن کمیشن (ایچ ای سی ) ڈاکٹر شائستہ سہیل، چندی یونیورسٹی تا وائس چانسلرز و ریکٹرز آک دیوان اٹی بشخ ہلکر۔ دیوان آن تران کرسا صدر مملکت یونیورسٹی تیا زور شاغا کہ او پاکستان اٹ روزگار نا کچ ءِ ودفنگ کن اکیڈمیا و انڈسٹری نا رابطہ غاتے مون آ درسا تینا طالب علم آتے مارکیٹ نا گرج آتا رداٹ کسب آن آراستہ کیر۔ اوجوان وڑآن ڈیزین کروک  آن لائن کورس و معاد آتا فراوانی و تشخیص نا گچین وڑوڈول نا کمک اٹ ورچوئل تعلیم نا آب ءِ گچین کننگ کن پبی کوشست کننگ آ ہم زور شاغا۔ بنجائی وزیر شفقت محمود مہارت آ مبنی تعلیم، فیکلٹی نا شونداری، و لیبز و تعلقدار تعلیمی آسراتی تیٹی زرکاری کرسا آب اٹ گریجویٹس تیار کننگ نا گرج آ زور شاغا۔ دیوان اٹی ایچ ای سی نا آن لائن و ڈسٹنس لرننگ پالیسی و یونیورسٹی تا درجہ بندی کن اونا آب آ خیال آتا درشانی آن بیدس بی ایس و ایم ایس گریجویٹس آتا کچ ءِ ودفنگ کن چندی سلاہ تیا ہم گپ وتران کننگا۔