اسلام آباد۔ 21 دسمبر (اے پی پی) صدر مملکت ڈاکٹر عارف علوی پارینے کہ پوریاگر برادری ملک انا راجی و اقتصادی شونداری ٹی بھلو کڑد اس ادا کننگ ءِ و حکومت نا کنڈآن اوفتا آسراتی و کمکاری کن سنجیدہ کوشست کننگ انگ ءِ، پوسکن اوار مروک ضلع (مسکوہی فاٹا) ٹی چندی بشخ آتیٹی چندی شونداری ڈٹ آتا بناءِ کننگانے و داڈٹ آتیان علاقہ غاتا مخلوق ءِ بھاز فائدہ مریک۔ صدر مملکت داخیال آتا درشانی ءِ خیبر چیمبر آف کامرس اینڈ انڈسٹری (کے سی سی آئی) نا اسہ ڈل اسے تون گپ وتران کرسا کرے ہراسے شنبے نادے آ داڑے ایوان صدر اٹی اوڑتون اوڑدہی کرے۔ ڈل انا کماشی ءِ کے سی سی آئی نا صدر سید حسن علی شاہ کریکہ۔ ڈل اتون گپ وتران کرسا صدر مملکت پارے کہ پرامن اوغانستان نئے بیرہ اوغانستان بلکن اونا ہمسایہ ملک آتیکن ہم زرگزرانی شونہالی اتنگ اٹ کمک ایتک۔ اوپارے کہ خیبرپختونخوا نا سیمی ضلع غاک خاص وڑاٹ خیبر اوغانستان تون واپار و واپاری وارخواہی تیان بھاز زیات فائدہ ہرفنگ کیرہ۔ اواو آئی سی نا وزرائے خارجہ نا کونسل نا17 می بھاز اہم انگا دیوان نا اڈتننگ کن حکومت نا کوشست آتا ہم ستا ءِ کرے و پارے کہ داڑآن اوغانستان اٹی انسانی امداد کن جہانی مخ تفی دوئی کننگ اٹ کمک رسینگک۔ ڈل صدر مملکت ءِ اوغانستان تون واپار نا بابت تینا ویل آتیان معلومدار کرے۔ ڈل دینی مرض آتیٹی پوریاگر برادری ءِ ریلیف فراوان کننگ کن حکومت نا کنڈآن کروک آ گام گیج آتا ہم ستاءِ کرے۔
