اٹک۔ 21 دسمبر (اے پی پی) وزیراعظم نا خصوصی کمکار موسمیاتی بدلی ملک امین اسلم خان پارینے کہ وزیراعظم پاکستان عمران خان نا اسلامی وزرائے خارجہ کانفرنس آن تران امت مسلمہ نا است آتا توار ءِ، اسہ دلیر و جہانی ءُ لیڈر اسے نا ساڑی گری ٹی اسہ ملک اس ہم پاکستان نا کنڈآ خراب انگا خن تے اٹ ہُننگ کپک، وخت بسنے کہ اوغان قوم انا بحالی کن مچ آ دنیا وزیراعظم عمران خان تون تفے تانکہ اوغان الس نا ویل آک ایسر مننگ کیر۔ سرسہب او آئی سی کانفرنس اڈترفنگ آ وزیراعظم عمران خان مبارکباد نا حقدار ءِ۔ میڈیا تون گپ وتران اٹی اومستی پارے کہ وزیراعظم پاکستان نا کنڈآن 57 اسلامی ملک آتا وزارت خارجہ نا دیوان نا مہمانداری قوم اکن بھلو شرفمندی اسے، اسلامی ملک آتا داوزرائے خارجہ نا پاکستان اٹی 41 سال آن پد بٹنگوک آ دیوان آن پک مس کہ عمران خان نئے بیرہ پاکستان بلکن عالم اسلام نا ہم پنی انگا لیڈر ءِ ہرا امت مسلمہ نا ویل آتے ایسر کننگ کن مسلمان تا اسیجائی پلیٹ فارم آن کوشست کننگ خواہک۔ خصوصی کمکار پارے کہ وزیراعظم پاکستان عمران خان ہمسایہ ملک اوغانستان نا الس ءِ مون تروک مشکل آتا ازالہ کن عالم اسلام ءِ اسیجائی حکمت عملی اس اختیار کننگ آ راضی کرسا دنیا نا ایلو بھلا واکدار تے باور کرفنگ نا کوشست کرینے کہ اوغانستان نا الس ءِ دا مشکل حالیت آتیٹی تنیا اِلنگا تو ہموجاگہ نا کروڑ آ الس پین مشکل آتا گواچی مریک ہراڑآن نئے بیرہ اوغانستان نا ہمسایہ ملک آک بلکن دنیا نا ایلو ملک آک ہم زہمی مریرہ ہنداخاطرآن اوغانستان نا الس نا کمک کن دنیا ءِ تینا کڑد ءِ ادا کروئی مریک ہراڑکن پاکستان مہالو آن عمران خان نا کماشی ٹی اوغانستان ءِ تنکی آن کشنگ کن کوشست کننگ ءِ۔
