اسلام آباد۔ 21 دسمبر (اے پی پی) جہانی تھنک ٹینک انسٹی ٹیوٹ آف پیس اینڈ ڈویلپمنٹ (انسپاڈ) نا صدر و پنی آ کشمیری دانشور ڈاکٹر سردار محمد طاہر تبسم پارینے کہ کشمیر نا ویل انا پائیدار و پرامن ایسر و کشمیری تا استصواب رائے نا حق اکن آگاہی مہم اتون اوار اوار اونا کانودی باندات آتے ہم ہُننگ نا گرج ءِ۔ کشمیریک تینا تحریک آجوئی ءِ تینا کمک تینٹ و خودانحصاری نا بنداو آ چلیفنگ ءُ ہراڑکن اوفک بے پناہ قربانی تسنو۔ پاکستان ننا ہمدرد وکیل و بھلا ایلم ءِ۔ او داڑے انٹرنیشنل لائر فورم فارجسٹس اینڈ پیس نا چیئرمین و پنی آ آئینی ماہر چوہدری محمد محفوظ ایڈووکیٹ و پاکستان سوشل ایسوسی ایشن آزاد کشمیر نا سیکرٹری جنرل پروفیسر چوہدری محمد بشیر تون گپ وتران کریکہ۔ ڈاکٹر طاہر تبسم پارے کہ کشمیر نا تحریک ہمہ جہت پلو اس تخک اونا آئینی و کانودی پلو بے حد اہمیت تخک ننے اونا علم مننگ المی ءِ۔ مننگ کیک کشمیری تے تینا حق آجوئی نا دوئی کننگ کن جہانی عدالت انصاف و جہانی کانودی ادارہ غاتا زوت درگہ ءِ خلوئی تمے ہراڑآ پورو ہوم ورک انا دمدستی گرج ءِ۔ اوپارے کہ دا باندات کن کشمیرنا ہڑتوم آ کنڈ و پیشن نا ملک آتا کشمیری ماہرین کانود آ تالان کمیٹی اس جوڑ کننگ نا گرج مریک، ہرا ویل انا غٹ پلو آتے ہرسا سمری اس تیار کے۔ چوہدری محمد محفوظ ایڈووکیٹ انسپاڈ نا صدر ءِ تینا پوسکن آ کتاب‘‘دی کشمیر ڈسپیوٹ اے لیگل وے فارورڈ’’ ہم پیش کرے ہراٹی کشمیر نا ویل انا آئینی و کانودی پلو آتیا سرجم پٹ وپول کننگانے۔
