اسلام آباد۔ 21 دسمبر (اے پی پی) کنگ سلمان ہیومینٹیرین ایڈ اینڈ ریلیف سینٹر اوغانستان کن کمکی پیکج نا بابت ڈٹ انا بناءِ کرینے۔ سینیٹ سیکرٹریٹ نا کنڈآن جاری بیان نا رداٹ ڈٹ انا بنا ءِ چیئرمین سینیٹ محمد صادق سنجرانی کرے ہرا بنائی دود انا مہمان خاص ئس۔ سعودی عرب نا کنڈآن 1920 ٹن غذائی و غیر غذائی گڑاہرفسا 200 ٹرک پاکستان نا کسر اٹ اوغانستان آ روانہ مسر۔ داڈٹ آن 2 لکھ 80 ہزار اوغان بندغ فائدہ ہرفنگ کیرہ۔ داوخت آ چیئرمین سینیٹ میڈیا تون گپ وتران کرسا پارے کہ 30 ہزار غذائی پیکجز و 10000غیر غذائی پیکج آتا بشخنگ آن اوغانستان اٹی رہینگوک آ نیزگار و حقدار بندغ آتا کمک مریک، سعودی عرب نا داانسان دوست گام انا ستاءِ کینہ، اوغانستان اٹی انسانی تنکی آن بچنگ کن دا وڑنا گام گیج کننگ بھاز اہم ءِ۔ اوپارے کہ ننا اوغانی ایلمک داوخت آ امداد نا چاری ءُ، جہانی برادری خاص وڑاٹ شون ہلوک ملک آک ہم سعودی عرب نا نقش وقدم آ چلینگسا اوغانستان اٹی امداد نا چاری مخلوق نا کمک ءِ کیر، اوغانستان اٹی انسانی تنکی آن بچنگ کن دا وڑنا کوشست آتیٹی ترندی اتنگ نا گرج ءِ۔ چیئرمین سینیٹ سعودی سفیر، کنگ سلمان فاؤنڈیشن ، پرنس سلمان وکنگ سلمان بن عبدالعزیز نا دا امداد آ منت واری ءِ ہرفے۔ اوپارے کہ سعودی عرب ہر مشکل وخت اٹی پاکستان نا کمک ءِ کرینے، او آئی سی دیوان ءِ بٹنگ و اونا اڈتننگ اٹ ہم سعودی عرب پاکستان نا کمک ءِ کرے و اوغانستان نا کمک ءِ کننگ نا درشانی ءِ کرے۔ اوپارے کہ پاکستان ہم اوغانستان تون کمکاری ءِ برجاتخک، غٹ ملک آک داوخت آمون آ بریر و اوغانستان نا شونداری ٹی کڑد ادا کیر۔ صادق سنجرانی پارے کہ پاکستان اوغانستان تون سلوک ءِ و اونا شونداری کن گام گیج ہرفسا کیک۔ داوخت آ سعودی سفیر نواف بن سعید المالکی گڑاتا فراوانی ٹی کمکاری فراوان کننگ آ پاکستان نا منت واری ءِ ہرفے۔ سینیٹر نصیب اللہ بازئی ہم چیئرمین سینیٹ تون اوار ئسک۔ ہر غذائی پیکج اٹ غٹ المی آ کنوئی آ گڑاک اوار ءُ وخت اس کہ غیر غذائی پیکج اٹی 20000لیپ و 10000کٹ اوار ءُ۔
