پشاور۔ 20 دسمبر (اے پی پی) پوسکن گچین مروک آ سینیٹر و سلاہکار خزانہ شوکت ترین پارینے کہ زرگزران 5 آن 6 درسد نا حساب اٹ مون آ ہِننگ ءِ زرگزران نا گچینی ٹی کمتی واقع مریک و الس ءِ ریلیف ملک، داخیال آتا درشانی ءِ او سینیٹر گچین مننگ آن پد خیبرپختونخوا اسمبلی ٹی میڈیا نا نمائندہ غاتون گپ وتران کرسا کرے۔ اسہ سوج اسے نا ورندی ٹی شوکت ترین پارے کہ گیس انا کوڑیک ترندی اٹ کم مننگ ءُ و حکومت نا کوشست ءِ کہ ہراڑے ہراڑے گیس انا پوسکن آ کوڑی خننگ انگ ءِ ہموکان ودی مروک آ گیس ءِ کاریم اٹ اتنگے، اوپارے کہ داوخت آ ہم اُرائی صارف آتے گیس انا فراوانی ٹی فوقیت تننگ انگ ءِ۔ شوکت ترین پارے کہ بجلی نا کمتی نا چہ ءُ ویل اس مون تروک اف بجلی نا لوڈشیڈنگ ہمو علاقہ غاتیٹی مننگ ءِ ہراڑے بجلی دُزی مریک ولے دُن تو داعلاقہ غاتیٹی ہم غٹ صارف آک بجلی دُزی کپسہ ہنداخاطرآن صارف آتے ریلیف تننگ کن ہندا حلقہ غاتیٹی ہم بجلی نا فراوانی ءِ پک کننگ انگ ءِ حالانکہ دا عمل اٹی حکومت ءِ مالی نسخان ہرفوئی تمنگ ءِ۔ اسہ پین سوج اسے نا ورندی ٹی اوپارے کہ کبینی جہانی ءُ ویل اسے ولے دا ویل اتون مون تننگ کن الس ءِ ہرممکن سبسڈی تننگ اُن و دا چرجوئی ٹی جوان انگا ہیت دادے کہ داسہ کنوئی آ گڑاتا نہاد آک کم مننگ بناکرینو۔ اوپارے کہ پاکستان نا الس ءِ اُراتا تفنگ و کشاری مسخت آتیکن بے سود وام ہم تننگ انگ ءِ۔
