لاہور ۔ 20 دسمبر (اے پی پی) وزیراعظم نا خصوصی کمکار سیاسی ابلاغ ڈاکٹر شہباز گل پارینے کہ تدوک آ منہ سال آن سموگ چاگڑدءِ خراب کرے، وزیراعظم عمران خان نا بننگ آن چاگڑدی نظام گچین مننگ ءِ، درخت خلنگ آن بروک آ دے تیٹی چاگڑد ساف مریک، دنیا پاکستان ءِ انوائرمنٹل چیمپئن پاننگ ءِ، او آئی سی نا دیوان غٹ پاکستانی تیکن گمر نا ہیت اسے، چِل سال آن پد پاکستان ءِ شرف ملادُوارہ، مچ آ امت مسلمہ دانگیا بس، اوغانستان ننتون تفوک ایلم ءِ، ہرادے نن اسُل تنیا اِلنگ کپنہ، ہموجاگہ نا حالیت آتیکن پاکستان غٹ آن مست توار بڑز کرے، ہراتم ہموڑے ویل بناکرے غٹ فریشان ئسر، وزیراعظم عمران خان اوغانستان نا حالیت آتیا ہرپلیٹ فارم آ توار بڑز کرے، انسانی المیہ غا ہرگڑاءِ ایڑتر تخسا سجفوئی تمک، او آئی سی نا بھاز سرسہب ءُ دیوان اس مس۔ دوشنبے نادے آ داڑے گورنر ہاؤس اٹی پریس کانفرنس کرسا ڈاکٹر شہباز گل پارے کہ او آئی سی ٹی اہم ءُ فیصلہ کننگا، او آئی سی اوغانی تے تنیا اِلیپننگ نا فیصلہ کرینے، ڈاکٹر شہباز گل پارے کہ الجزیرہ نا انٹرویو ءِ بھاز مہالو ہلنگا ولے او تینا مرضی اٹ اودے چلیفے۔ اوپارے کہ مچ آ مسلم امہ عمران خان نا توار تون تفے، مریم اورنگزیب درو گڑاس ہیت کرے اسٹ او عمران خان نا خڑچہ نا ہیت آتے کرسا کرے، ہراتم اسہ بندغ اس انکار کے تو تینا ہیت ءِ بایدے پدی ہلنگے، نی دوبہ ءِ پک کہ یا معافی خوا۔ ڈاکٹر شہباز گل پارے کہ مریم اورنگزیب غلامی نا شونق اٹ درو نا دے پریس کانفرنس کرے و پارے کہ عمران خان نا بوٹ انا تسمہ ہم اونا جند انا اف، نمے آن اسٹ نا ہم قد عمران خان نا بوٹ آن بڑز اف۔ عدالتی پرمان تیان چپ تینا شوگر مل سویلی پنجاب آ درے، چار سد کروڑ روپئی دِنا بوٹ آتا تسمہ غاتیٹی تفسا ملازم آتا اکاؤنٹ اٹ تخنگا، میڈیا چینل آک پیسہ ہلیرہ ولے ورکرز آتے پیسہ تفسہ، سما اف شریف خاہوت ءِ داخہ در کم پیسہ غاتیٹی ملازم ہراکان ملک، منہ ہزار تنخواہ ہلوک آتا اکاؤنٹ اٹی ارب آ روپئی برسا کرے، پی ایم ایل این نرینہ غاتیٹی نمبرون پارٹی ءِ اگہ اینو دوزخ اٹ الیکشن کرفر ن لیگ اولیکو آ نمبر آ بریک، دالسٹ تسمہ غاتیٹی تفنگوک اُس اف، عمران خان نا تسمہ نظر بریک ، بھارت آن بروک آ پچ آتے نم خمپیرے۔ شہباز گل پارے کہ دا اے ٹی ایم نا ہیت ءِ بھاز کیک نی نوشتہ کرسا مناس کہ قطری ننا اے ٹی ایم ءِ ، لندن نا اپارٹمنٹ ءِ او خیرات اٹ تسوسس، قطری تے ہراآسراتی تے تسنورے ہراڑآن اپارٹمنٹ ملک، نی ہرا باہ اتون ایلو ہیت آتے کیسہ، شہباز شریف نا کرپشن نا ٹی وی آ پروگرام چلینگ انگ ءِ۔ اوپارے کہ عمران خان آ بش مروک آ ہر سوج انا ورندی ءِ تننگ اُن، نن چل سال انا حساب ءِ تسن نم پارے ننا اے ٹی ایم قطری ءِ، نم ارب آتیٹی سرکاری دورہ کرینورے وخت اس کہ عمران خان شانزدہ کروڑ اٹ او درہ کرینے، قوم ءِ ورندی ایتبو دا پیسہ غاک ہراکان و انت اکن بسنو، پک مننگ کن عدالت اٹ مقدمہ چلینگک۔ مریم و نواز شریف آ دوبہ پک مس اوفتے سزا مس ہراڑے پین کرپشن پک مروئی ءِ ہموڑے تاریخ آ تاریخ ہلیرہ دا فک مخلوق ءِ دھڑکو ایترہ ویڈیوتا، کیس چلینگک تو فیصلہ مریک، کلرک آتا اکاؤنٹ اٹی پیسہ غاتا بننگ نا ورندی اف۔ ڈاکٹر شہباز گل پارے کہ شہزاد اکبر مننگ کیک کس اسے وڑپ ہنداخاطرآن تنقید کیرہ، شہزاد اکبر ہنداڑے کن ءِ ہراتم کاہک اونا ورندی ءِ ایتک۔
