اسلام آباد۔ 20 دسمبر (اے پی پی) اسلامی کمکار تنظیم (او آئی سی) نا سیکرٹری جنرل حسین ابراہیم طٰحہ پارینے کہ اوغانستان نا ساڑی آ حالیت آتیا او آئی سی وزرائے خارجہ کونسل نا 17 می بھاز اہم انگا دیوان اٹی اوغان الس نا کمک کن جہانی فنڈ انا ٹہیفنگ و اوغانستان کن او آئی سی نا خصوصی نمائندہ نا تعیناتی اہم ءُ سرسہبی اسے، اومیت ءِ کہ اسلامی کمکار تنظیم نا باسک ملک آتیان بیدس ایلو ملک آک ہم دا فنڈ اٹی تینا بشخ ءِ شاغرہ، بھاز اہم انگا دیوان نا سرسہبی ستاکڑزک، اومیت ءِ کہ داڑآن ڈیہہ خاص وڑاٹ اوغانستان اٹی گچینی بریک۔ او دوشنبے نادے آ او آئی سی دیوان اٹی بشخ ہلنگ آن پد وطن آ پدی روانہ مننگ آ میڈیا تون گپ وتران کریکہ۔ داوخت آ وزیر مملکت حوالکاری و شینکاری فرخ حبیب و ایلوفک اودے سپارار۔ او آئی سی سیکرٹری جنرل پارے کہ او آئی سی دیوان نا سرسہب اڈتننگ آ پاکستان نا الس و حکومت نا منت وار اُن، دا بھاز اہم انگا دیوان اسہ بھلو سرسہبی اس ئس، ڈیہہ ٹی مروک آ پیش رفت نا بابت دا دیوان اہم ئس۔ اوپارے کہ دا اہم انگا دیوان سرسہب مس ہراکہ اسہ ستاکڑزوک ءُ ہیت اسے، کانفرنس آن ڈیہہ خاص وڑاٹ اوغانستان نا حالیت آتیٹی گچینی بریک ۔ اوپارے کہ دادیوان نا اسہ اہم ءُ سرسہبی اس دادے کہ او آئی سی نا دیوان اٹی او آئی سی نا اسسٹنٹ سیکرٹری طارق بخیت ءِ نمائندہ خصوصی اوغانستان پن کننگا ہرا تینا کاریم نا بناءِ ہم کرینے، او رابطہ کاری نا کاریم ءِ سرایتک، اودیوان اٹی شریک طالبان نا نمائندہ تون اوڑدہی ہم کرے، اومیت ءِ او آخبت اٹ ہم تعلقدار ادارہ غاتون رابطہ ٹی مریک۔ سیکرٹری جنرل او آئی سی پارے کہ ارٹ میکو بھلا سرسہبی اوغانستان نا الس کن خصوصی فنڈ انا ٹہیفنگ ءِ ہراٹی نئے بیرہ او آئی سی نا باسک ملک آک بلکن ایلو ملک آک ہم کمک کیرہ تانکہ 40 سال آن مشکل آتا گواچی اوغانی تا کمک مننگ کے۔ اوپارے کہ دیوان اٹی اوغانستان کن است بڈ پڑو کننگانے، داوزراء خارجہ نا کانفرنس نا تاریخی اثر مرتب مریک ۔ داوخت آ وزیر مملکت حوالکاری و شینکاری فرخ حبیب او آئی سی نا سیکرٹری جنرل نا منت واری ءِ ہرفسا پارے کہ اومیت ءِ کہ اوغانستان نا بارواٹ او آئی سی نا نمائندہ خصوصی فعال کڑد ادا کیک۔ اوپارے کہ اوغانستان اٹی انسانی المیہ ودی مسنے ہرانا توننگ کن او آئی سی نا پلیٹ فارم آن پبی توار چست کننگا۔
