اسلام آباد۔ 20 دسمبر (اے پی پی) قومی احتساب بیورو نا چیئرمین جسٹس جاوید اقبال پارینے کہ بزنس کمیونٹی نا ملک انا شونداری و زرگزرانی شونہالی ٹی کڑد بھاز اہم ءِ ہرادے نیب بھاز اہمیت ایتک۔ نیب انکم ٹیکس، سیلز ٹیکس و انڈر انوائسز نا کیس آتے کانود نا رداٹ ایف بی آر آ گدریفے، نیب اعلامیہ نا رداٹ میگاکرپشن مقدمہ غاتے ایسر اسکان سرکننگ وملک آن وڈی خوری نا چٹفنگ نیب انا اولیت ءِ ہراڑکن پبی کوشست کننگ انگ ءِ، وائٹ کالرکرائمز نا انویسٹیگیشن بھلو چیلنج اسے، نیب آفیسر آک ملک آن وڈی خوری نا چٹفنگ ءِ قومی فرض تکسا ادا کننگ ءُ۔ نیب ءِ غٹ آن زیات غاو جعلی ہاؤسنگ سوسائٹی و مضاربہ سکینڈل نا بارواٹ دوئی مریک۔ اوپارے کہ غیر کانودی ہاؤسنگ سوسائٹیک کانود نا رداٹ ڈغار آن بیدس یا چنکو ڈغا ر اس خسا کودک و نیزگار شاری تے پرکشش اشتہار تا کمک اٹ جوان ءُ تغ نشان ترسا پلرہ۔ چیئرمین نیب ، نیب انا غٹ علاقائی بیورو تیان جعلی ہاؤسنگ سوسائٹی/کوآپریٹیو سوسائٹی/مضاربہ سکینڈلز آ داتم اسکان نا پیش رفت رپورٹ ءِ بٹنگانے تانکہ زہمی تا غاو تا کانود نا رداٹ زوت آن زوت ازالہ ءِ کرسا زہمی تے اوفتا مچ آ زند انا پلوک آ زر آتے پدی تننگ کن کوشست آتے پین ترند کننگے۔ اوپارے کہ نیب تینا سینئر سپروائزری آفیسر آتا اجتماعی دانش آن فائدہ ہرفنگ کن اسیجائی جاست وپاستی ٹیم انا نظام اس مون آ اتنگ آن بیدس غاوتیان غاوتا جانچ پڑتال کن 2 تُو انا وخت ، غاوتا جانچ پڑتال آن انکوائری کن 4 تُو انا وخت وخت اس کہ انکوائری آن انویسٹیگیشن کن 4 تُو انا وخت مقرر کرینے ہنداوڑ نیب مقدمہ غاتے سرتننگ کن دہ تُو انا وخت مقرر کرینے ہرانا جوان ءُ بھرم اس مون آ بننگ ءِ۔ داکان بیدس نیب مقدمہ غاتا پوسکن آ وڑوڈل آتیا جاست وپاست کن فرانزک سائنس لیبارٹری اس جوڑ کرینے ہرانا مسخت انویسٹیگیشن نا آب ءِ پین گچین جوڑ کننگ ہرانا بنداو آ پراسیکیوشن پبی شاہدی تا بنداو آ شرفمند آ عدالت آتیٹی نیب مقدمہ غاتا گچین پیروی ءِ کیک۔ ہنداسوب ءِ کہ تدوک آ 4 سال اٹی نیب انا 1194 دوبہ دارآتے شرفمند آ احتساب عدالت آک کانود نا نئے بیرہ سزا بنفیر بلکن ارب آ روپئی جرمانہ ادا کننگ نا ہم سزا بنفیر۔ نیب تینا جوڑ مننگ آن داتم اسکان 821 ارب روپئی بلواسطہ و بلاواسطہ وڑاٹ دوئی کرے وخت اس کہ تدوک آ 4 سال اٹی 539 ارب روپئی بلواسطہ و بلاواسطہ وڑاٹ دوئی کرے ہراکہ اسہ ریکارڈ سرسہبی اسے ہرانا اعتراف ءِ متبر قومی و جہانی ادارہ غاک کرینو۔
