پشاور۔ 20 دسمبر (اے پی پی) بنجائی وزیر سائنس و ٹیکنالوجی شبلی فراز پارینے کہ وزیراعظم عمران خان نا نظریہ ءِ کہ الیکشن اٹ شفافیت بایدے مرے نن ہندا نظریہ نا رداٹ مون آ ہِننگ اُن۔ داوار بلدیاتی گچین کاری مستین نا مقابلہ ٹی جم وڑاٹ گچین چاگڑداٹ مسنو۔ پشاور اٹی میڈیا تون گپ وتران کرسا صحافی تا سوج آتا ورندی ٹی او پارے کہ پی ٹی آئی نا کارندہ غاک پارٹی نا اصل میرات ءُ و اوفتے بڑزآ اتنگک۔ اوپارے کہ پارٹی نا کہول آ داہیت انا جاچ ءِ ہلنگک بلدیاتی گچین کاری تا بابت ہراڑے کمتی سلیسونے، داچرجوئی ٹی اسہ کمیٹی اس جوڑ کننگانے ہرابلدیاتی گچین کاری تا بابت غٹ باندات آتا جاچ ءِ ہلسا تینا رپورٹ ءِ مرتب کیک ہرانا بنداو آ بروک آ گچین کاری تیکن حکمت عملی نا تعین ءِ کننگک۔ اوپارے کہ بلدیاتی گچین کاری تا اولیکو ریسہ ہراپارٹی نزوری تا پیدواری ءِ کننگانے اوفتا مون ءِ تورنہ، پارٹی نا پنجر ءِ شیفکو کہول اسکان متحرک و سوگو کینہ وپارٹی ڈسپلن ءِ پین گچین کینہ۔ شبلی فراز پارے کہ داوار بلدیاتی گچین کاری مستین نا مقابلہ ٹی جم وڑاٹ گچین چاگڑد اٹ مسنو و کم ہنگامہ آرائی مون آ بس۔ اوپارے کہ دُن تو تشدد نا اسہ واقعہ اس ہم پیش مفروسس ولے چونکہ بلدیاتی گچین کاری شیفکو کہول اسکان نا گچین کاری مریک ہنداخاطرآن اوٹی تشدد و تصادم نا خطرہ زیات مریک۔ اوپارے کہ وزیراعظم عمران خان نا نظریہ ءِ کہ گچین کاری تیٹی شفافیت مرے نن ہند انظریہ نا رداٹ مون آ ہِننگ اُن۔
