خضدار۔ 20 دسمبر (اے پی پی) صوبائی وزیر آبپاشی و برقیات میر محمد خان لہڑی پارینے کہ دیر انا کاختی صوبہ نا اہم و سنگین ءُ ویل اسے، حکومت دیری کوڑی تے رکھ کاریم اٹ اتنگ نا قابل و لکھ آ ایکڑ بنجر ڈغار تے دسنگ نا قابل کننگ کن بھلو زر اسے نا خڑچ آن ہرممکن گام گیج کننگ ءِ، ہزار آ ایکڑ بنجر ڈغار تے دسنگ نا قابل اتسا نن ملکی زرگزران ءِ سوگوی تننگ کینہ، بلوچستان اٹی دیری کچ انا خطرناک حداسکان شیف تمنگ فریشانی نا سوب ءِ۔ داخیال آتا درشانیءِ او تدوک آ دے خضدار اٹی اسہ دیوان اسے ٹی محکمہ نا آفیسر آتون گپ وتران کرسا کرے۔ داوخت آ سیکرٹری آبپاشی فتح محمد بھنگر چیف انجینئر خضدار ارشاد جمالی و ایگزیکٹیو انجینئرایریگیشن خضدار سعید مصطفیٰ خضدار اٹی برجا شونداری اسکیم تا بابت حوال ترسا پاریر کہ ضلع خضدار نا تحصیل وڈھ اٹی ٹین ڈیم پروجیکٹ نا رداٹ کل دہ ڈیم تیا شست درسد شونداری کاریم ءِ پورو کننگانے وخت اس کہ پیر ابراہیم ڈیم کرخ آ نود درسد کاریم مسنے۔ فیڈرل پی ایس ڈی نا رداٹ برجاسمال ڈیمز پروجیکٹ نا رداٹ خضدار اٹی نہہ ڈیم تیا ہشتاد ءُ پنچ درسد کاریم پورو مسنے۔ میر محمد خان لہڑی پارے کہ فنڈ انا فراوانی ءِ پک کننگ کن گام گیج کننگک ، زیر تعمیر اسکیم تے بلاتاخیر تخوک آ وخت و تعمیرات اٹ ڈیوالئی ءِ ہچ ءُ حالیت اسے ٹی سگنگ پننگک۔ اوپارے کہ دیری کاختی ءِ مر کننگ کن بنجائی و صوبائی حکومت آک ہر ممکن گام گیج کننگ ءُ تانکہ زیر تعمیر ڈیم تے وخت آ پورو کرسا بارانی دیر ءِ رکھ و زیان مننگ آن بچفنگے۔
