اسلام آباد۔ 19 دسمبر (اے پی پی) وزیراعظم عمران خان اوغانستان اٹی انسانی حالیت آتا بابت اسلامی کمکار تنظیم (او آئی سی ) نا وزرائے خارجہ کونسل نا بھاز اہم انگا دیوان ءِ بٹنگ انگ نا سعودی عرب نا گام انا ستاءِ کرسا اومیت ظاہر کرینے کہ دنیا اوغانستان ءِ تنیا اِلنگ نا ردینک ءِ دُوارہ کپک۔ اوجہانی برادری آ زور شاغا کہ او اوغانستان نا نزور الس نا کمک ءِ کے۔ داخیال آتا درشانی ءِ او سعودی عرب نا وزیر خارجہ شہزادہ فیصل بن فرحان السعود تون اوڑدہی ٹی گپ وتران کرسا کرے۔ یک شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم عمران خان خادم الحرمین الشریفین شاہ سلمان بن عبدالعزیز السعود و ولی عہد شہزادہ محمد بن سلمان کن نیک است خواہی تا درشانی ءِ کرے۔ اوغان الس نا مشکل آتا چٹفنگ نا بابت وزیراعظم پارے کہ پاکستان اوغان الس نا انسانی بنداو تیا کمک کن پاکستان آن کاریم کروک آ تنظیم تے آسراتی فراوان کرے۔ اوغانستان نا الس نا راجی آسراتی کن پاکستان نا عزم انا درشانی ءِ کراس اوپارے کہ پاکستان انسانی بنداو تیا دمدستی ریلیف کن 5 ارب روپئی نا امداد تسنے ہراکہ 50 ہزار ملین ٹن خولم، ہلہلہ ئی طبی آسراتی، یخ آن بچنگ کن شیلٹرز و ایلو گڑاتتون اوار کنوئی آ گڑاتیا تالان ءُ۔ پاکستان و سعودی عرب نا نیام اٹ ہڑتوم آ کنڈآتا تعلقداری نا بابت وزیراعظم دا تعلقداری تا اہمیت ءِ تالان کرے ہراکہ خڑکی دوستانہ تعلقداری، تاریخی رابطہ و شیفکو کہول آ کمکاری آ مبنی ءُ۔ اکتوبر 2021 اٹی تینا دورہ سعودی عرب نا حوالہ ءِ ترسا وزیراعظم دا دورہ ٹی کروک آ فیصلہ غاتیا عملدرآمد ءِ تالان کرے و چندی بشخ آتیٹی تین پہ تینی تعلقداری تے پین سوگو کننگ کن کمکاری نا پوسکن آ وارخواہی تے پٹنگ نا گرج آ زور شاغا۔ اوآئی سی نا وزرائے خارجہ کونسل نا اہم انگا دیوان نا مہمانداری ءِ کننگ آ وزیراعظم عمران خان نا منت واری ءِ ہرفسا سعودی عرب نا وزیر خارجہ شہزادہ فیصل بن فرحان السعود اومیت ظاہر کرے کہ دا دیوان اوغان الس نا انسانی بندو تیا امداد کن جہانی برادری ءِ متحرک کننگ نا ذریعہ جوڑ مریک۔ اوپارے کہ سعودی عرب پاکستان تون سوگو تعلقداری تے اہمیت ایتک ہرا ایلمی آ مبنی ءُ۔ پاکستان و سعودی عرب نا نیام اٹ خڑکی و تین پہ تینی دوستانہ تعلقداری ءِ، سعودی عرب جموں و کشمیر نا بارواٹ او آئی سی رابطہ پڑک نا ہم باسک ءِ و کشمیر کاز انا پبی مخ تفی ءِ کیک۔
