اسلام آباد۔ 19 دسمبر (اے پی پی) وزیراعظم عمران خان تون ملائیشیا نا وزیر خارجہ داتو سری سیف الدین عبداللہ اوڑدہی کرے۔ یک شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم عمران خان اسلامی کمکار تنظیم نا وزراء خارجہ کونسل نا اہم انگا دیوان اٹی بشخ ہلنگ آ ملائیشیا نا منت واری ءِ ہرفسا اسلامی کمکار تنظیم اٹ اونا گچین کڑد و اوغانستان اٹی انسانی بنداو تیا امداد و امن سازی کن کوشست آتا ستاءِ کرے۔ وزیراعظم عمران خان پارے کہ پاکستان و ملائیشیا نا نیام اٹ علاقائی و جہانی کہول آ کمکاری و تین پہ تینی شرف سوگو تاریخی تعلقداری ءِ، پاکستان زرگزرانی کمکاری ٹی ودکی، سیل و سوات ، دفاع و السی کہول آ رابطہ غاتا رداٹ کمکاری ءِ سوگو کننگ نا کمک اٹ ہڑتوم آ کنڈآتا کمکاری ءِ پین سوگو کننگ کن سنبرینگوک ءِ۔ ملائیشیا نا وزیرخارجہ داتو سری سیف الدین عبداللہ اوغانستان نا بابت اسلامی کمکار تنظیم نا اہم انگا دیوان ءِ بٹنگ انگ ءِ اوغانستان نا الس ءِ انسانی تنکی آن بچفنگ کن وخت آ گام اس گوندسا اونا ستاءِ کرے۔ اواوغانستان اٹی امن و سوگوی نا مون آ دننگ کن پاکستان نا تعمیری کڑد انا ستاءِ کرے۔ اوپاکستان آ بننگ آ تینا شاندار بیابخیر و مہمانداری آ وزیراعظم عمران خان و پاکستانی الس نا منتواری ءِ ہرفے۔
