اسلام آباد۔ 19 دسمبر (اے پی پی) اسلامی شونداری بینک انا چیئرمین ڈاکٹر محمد الجسر پارینے کہ اسہ ملک یا ادارہ اس اوغانستان نا مالیاتی تنکی و انسانی المیہ ءِ توننگ کن تنیا ہچ اس کننگ کپک، اوغانستان اٹی امن و سوگوی کن جہانی کہول آ کوشست آتا گرج ءِ، اوغانستان ءِ انسانی ہمدردی نا رداٹ امداد تون اوار اوار دیرپا شونداری و مالی امداد نا فراوانی المی ءِ۔ او یک شنبے نادے آ داڑے اسلامی کمکار تنظیم (او آئی سی ) نا وزرائے خارجہ نا کونسل نا 17 می اہم انگا دیوان آن تران کریکہ ۔ اوپارے کہ اینو نن اوغانستان نا الس تون یکجہتی نا درشانی کن مچ مسونن۔ اسلامی شونداری بینک انا چیئرمین پارے کہ جہانی برادری مستین آن سبخ اس ہلسا اوغانستان نا ویل آتے ایسر کننگ کن تینا پبی کڑد ءِ ادا کے۔ اوپارے کہ جہانی ادارہ و علاقائی تنظیمک ساڑی حالیت آتیٹی اوغانستان نا کمک ءِ کیر تانکہ او ساڑی تنکی آن پیش تمنگ کے، اوغانستان نا گیشتر آبادی خلق آتیٹی رہینگک ہرافتا کمک نا گرج ءِ۔ اونا پاننگ ئس کہ بینک 1975 ءآن اسلامی دنیا ٹی خذمت سرتننگ ءِ و تدوک آ 46 سال اٹی او، او آئی سی نا باسک ملک آتا پبی کمک ءِ کرینے ہرانا مسخت اوفتے اقتصادی و راجی وڑاٹ سوگو کننگ ءِ۔ اوپارے کہ اوغانستان کن ہیومینیٹیرن ٹرسٹ فنڈ اس جوڑ کرینن، اسلامی شونداری بینک اوغانستان اٹی مالیاتی رابطہ کن ہم کڑد ادا کیک، نن غٹ ملک آتیان دا بارواٹ کمک نا خواہندار اُن۔ اسلامی شونداری بینک انا چیئرمین او آئی سی وزراء خارجہ کونسل کانفرنس نا اڈتننگ آ پاکستان و سعودی عرب نا منت واری ءِ ہرفے۔ اسلام آباد اٹی مخدوم شاہ محمود قریشی ، او آئی سی نا سیکرٹری جنرل ، باسک ملک آتا وزیرخارجہ غاک ، مندوبین و مبصرآتیان بیدس اقوام متحدہ نا چندی تنظیم، جہانی مالیاتی ادارہ، پی فائیو، یورپی یونین و ایلو ادارہ غاتا نمائندہ غاک ہم بشخ ہلکر۔ کانفرنس پاکستان نا ہمو کوشست آتا بشخ ءِ ہرانا مسخت اوغانستان نا ساڑی حالیت آتا کنڈآ جہانی برادری نا چکار ءِ کرفنگ ءِ تانکہ مریس جنگ و خانہ جنگی آن زہمی ملک ءِ بھلو انسانی تنکی اسے آن توننگ مرے۔ اسلامی کمکار تنظیم نا وزرائے خارجہ نا کانفرنس نا بنداوی مسخت مسلم امہ نا کنڈآن اوغانستان نا الس تون یکجہتی نا درشانی ءِ وخت اس کہ اوفتے انسانی بنداو تیا اوغانستان ءِ امداد نا فراوانی کن پبی گام گیج کننگ ءِ۔ داکانفرنس نا اڈتننگ آن دنیا ءِ دا بور کرفنگانے کہ اوغانستان نا ساڑی حالیت آک بیرہ اسہ انسانی المیہ سے ودی کننگ کپک بلکن اونا نتیجہ ٹی ڈیہہ و جہانی امن و سلامتی ءِ سنگین خطرہ لاحق مننگ کیک۔ اقوام متحدہ نا انڈر سیکرٹری جنرل انسانی امور و ہلہلہ ئی امداد کوآرڈنیٹر مارٹن گریفتھس وزراء خارجہ کانفرنس آن تران کرسا پارے کہ اوغانستان نا ساڑی حالیت آتا سوب ملکی زرگزران ءِ سخت مشکل مون تروک ءِ، اوغانستان اٹی 23 ملین مخلوق ءِ بین نا خطرہ ءِ، دا حالیت آتا سوب آن ملک اٹی جان جوڑی و تعلیم نا بشخ ہم بھاز بے وڑ زہمی مسنے ، 70 درسد استاد آتے تنخواہ ملپننگ ءِ وخت اس کہ لکھ آ چناک تعلیم آن محروم مننگ ءُ۔ اوپارے کہ ساڑی حالیت آتا سوب زرکاری سلیسونے، انسانی ہمدردی نا ادارہ غاک مون آ برسا کڑد ادا کیر۔ اوغانستان اٹی جہانی شونداری امداد بند مسنے و اونا نتیجہ ٹی ملک اٹ نیزگاری و بے روزگاری ہم ودانے۔ اوپارے کہ او آئی سی اوغانستان اٹی انسانی المیہ ءِ توننگ کن مون آ بننگ نا کڑد ادا کرینے و اینو نا دا کانفرنس اوغان الس تون یکجہتی نا درشانی ءِ۔
