اسلام آباد۔ 19 دسمبر (اے پی پی) اسلامی کمکار تنظیم نا وزرائے خارجہ نا 17 می بھاز اہم انگا کانفرنس یک شنبے نادے آ بنجائی دارالحکومت اسلام آباد اٹی بناکرے، داڑے پارلیمنٹ ہاؤس اٹی مروک آ دا کانفرنس نا مہمانداری ءِ پاکستان کننگ ءِ ہراٹی اوغانستان نا حالیت آتیا سجفنگک۔ وزرائے خارجہ کانفرنس نا کماشی ءِ وزیرخارجہ مخدوم شاہ محمود قریشی کننگ ءِ۔ کانفرنس اٹی وزیراعظم عمران خان، او آئی سی نا سیکرٹری جنرل، باسک ملک آتا وزرائے خارجہ، مندوبین و مبصرآتیان بیدس اقوام متحدہ نا چندی تنظیم، جہانی مالیاتی ادارہ، پی فائیو، یورپی یونین و ایلو ادارہ غاتا نمائندہ غاک ہم شریک ءُ۔ کانفرنس نا اڈتننگ پاکستان نا ہمو کوشست آتا بشخ ءِ ہرافتا مسخت اوغانستان اٹی ساڑی آ حالیت آتا کنڈآ جہانی برادری نا چکار ءِ کرفنگ ءِ تانکہ ہموڑے ہروڑنا انسانی تنکی ءِ توننگ مرے۔ اسلامی کمکار تنظیم نا وزرائے خارجہ نا اسلام آباد اٹی مروک آکانفرنس نا بنداوی مسخت مسلم امہ نا کنڈآن اوغانستان نا الس تون یکجہتی نا درشانی و انسانی بنداو تیا اوغانستان ءِ امداد نا فراوانی کن پبی گام گیج کننگ ءِ۔ گیشتر رداٹ داکانفرنس نا اڈتننگءِ دامسخت کن کننگانے تانکہ دنیا ءِ دا باور کرفنگے کہ اوغانستان نا ساڑی آ حالیت آک بیرہ اسہ انسانی المیہ ءِ ودی کپک بلکن اونا نتیجہ ٹی ڈیہہ و ڈیہہ غان پیشن ہم امن وسلامتی ءِ بھلو خطرہ لاحق مننگ کیک۔
