اسلام آباد۔ 19 دسمبر (اے پی پی) وزیراعظم عمران خان پارینے کہ 19 دسمبر 2021ءآ اسلام آباد اٹی اڈ ہلوک آ اسلامی کمکار تنظیم (او آئی سی) نا وزراء خارجہ نا کونسل نا 17 می اہم انگا دیوان نا مہمانداری ءِ کننگ پاکستان کن بھاز خوشی نا وخت ءِ، دا اہم انگا دیوان اوغانستان نا بگڑینگوک آ حالیت خاص وڑاٹ انسانیت ءِ مون تروک چیلنج آتا جاچ ءِ ہلیک و اوغان الس نا کمک کن ہندن ءُ گام گیج سلاہ کیک ہرافتے جہانی برادری نا کنڈآن مخ تفی و کمکاری نا سخت گرج ءِ۔ پاکستان نا مہمانداری ٹی او آئی سی وزراء خارجہ کونسل نا 17 می اہم انگا دیوان نا وخت آ تینا خصوصی کلہو اٹی وزیراعظم عمران خان پارے کہ اوغانستان ءِ داوخت آ انسانی تنکی مون تروک ءِ، وخت آ امداد سرمتوتو تنکی زرگزرانی بھسکاری نا سوب مننگ کیک، نتیجتا سیکورٹی نا حالیت آک پین خراب مننگ تون اوار اوار نزوری نا ودی مننگ نا خطرہ ءِ، داعوامل آتا سوب اوغانستان آن بھلو کچ اسے ا انسانی ہمپنگ نا گڑتی ءِ۔ وزیراعظم پارے کہ او آئی سی مسلم امہ نا اجتماعی توار مرسا اوغان ایلم تا دمدستی انسانی و راجی و اقتصادی گرج آتے پورو کننگ اٹ تینا اہم کڑد ءِ ادا کننگ کیک، اومیت ءِ کہ او آئی سی تینا ہنداکڑد ءِ ضرور ادا کیک۔ اوپارے کہ پاکستان نا مہمانداری ٹی دا اہم انگا دیوان نا بحیثیت چیئرمین او آئی سی طلبی مملکت سعودی عرب نا ستاکڑزنگ نا قابل فیصلہ ءِ، او آئی سی نا وزراء خارجہ ، نمائندہ، بڑزکو کمامدار، باسک ملک آتا بڑزکو عہدیدار و مبصرآتون اوار ایلو ملک آک و علاقائی و جہانی تنظیم تا خصوصی مندوبین آتاہم است انا حب اٹ ستا ءِ کینہ ہرا اسلام آباد نا دورہ ءِ کننگ ءُ۔ وزیراعظم عمران خان پارے کہ ننے پکا یخین ءِ کہ دا دیوان اسلامی یکجہتی و ایلمی نا روایت آتے برقرار تخسا اوغان ایڑھ ایلم تیکن بھرمی پک مریک، دا گام اوغان الس نا راجی آسراتی کن ایلو جہانی ادارہ و شریدار آتا مخ تفی ءِ دوئی کننگ اٹ ہم کمکار مریک ہرا اوغانستان اٹی امن و سوگوی ءِ پائیدار کننگ اٹ المی شڑت ءِ۔
