اسلام آباد۔ 19دسمبر (اے پی پی) وزیرخارجہ شاہ محمود قریشی پارینے کہ او آئی سی نا ساڑی آ چیئرمین نا حیثیت اٹ سعودی عرب نا کنڈآن پیش کروک سلاہ نا پس منظر اٹ پاکستان (اینو) یک شنبے 19 دسمبر 2021ء آ اوغانستان نا باندات آ اسلامی کمکار تنظیم (او آئی سی ) نا وزراء خارجہ نا کونسل نا بھاز اہم انگا دیوان نا مہمانداری نا شرف ءِ دوئی کننگ ءِ، داکان مست اوغانستان نا حالیت آتیا ہنداوڑانا دیوان 1981ء ٹی اڈ ہلکوسس، اسلامی کمکار تنظیم نا 56 باسک ملک آتیان بیدس اقوام متحدہ، جہانی مالیاتی ادارہ و پنچ بھلا ملک آک دُن کہ اہم شریدار آتے دیوان اٹی بٹنگ انگانے۔ پاکستان نا مہمانداری ٹی او آئی سی وزراء خارجہ کونسل نا 17 می بھاز اہم انگا دیوان نا وخت آ تینا خصوصی کلہو اٹی وزیرخارجہ شاہ محمود قریشی پارے کہ اوغانستان اٹی وقوع پذیر ساڑی آ حالیت آتے مون آ تخسا پاکستان مہالوآن بھلو کچ اسے آ سفارتی رابطہ و کوشست آتے برجاتخانے، اینو نا دا بھاز اہم انگا دیوان نا اڈتننگ ہم ہموکوشست آتا چرجوئی ءِ ہرافتا مسخت اوغانستان اٹی ترندی اٹ بگڑینگوک آ انسانی حق انا حالیت و گمانی اقتصادی بھسکاری ءِ توننگ ءِ۔ وزیرخارجہ پارے کہ او آئی سی وزراء خارجہ کونسل نا دا دیوان اوغان الس ءِ مون تروک انسانی گرج آتا فراوانی کن اسہ پلیٹ فارم اس تننگ تون اوار اوغان الس نا کمک کن اسہ پبی ءُ قابل عمل وڑوڈول اس ہم مون آ اتیک، دادیوان جہانی برادری نا چکار ءِ اوغانستان اٹی ہمو بگڑینگوک آ حالیت آتا کنڈآ کرفک ہرانا نتیجہ ٹی سیکورٹی نا تشویشناک حداسکان بگڑینگ انگ و نزوری نا ودی مروک آ خطرہ ءِ، نتیجتا بھلو کچ اسے آ اوغان الس ایلو ملک آتا کنڈآ ہمپیرہ ہرانا لامحالہ علاقائی و جہانی امن و سیکورٹی آ خراب ءُ اثرمرتب مریک۔ مخدوم شاہ محمود قریشی پارے کہ پاکستان ا وآئی سی نا بانی باسک مننگ نا ناطہ اسلامی یکجہتی و اسیجائی اسلامی گام گیج آتا زبردست مخ تف مننگ تون اوار اوار تنظیم نا کڑد و شریداری ءِ قدر انا نظر اٹ ہرک، اومیت ءِ دا اہم انگا دیوان دامشکل وخت اٹی اوغان الس نا تکلیف آتے مر کننگ نا بنداوی مسخت اٹ بھرمی مریک۔
