اسلام آباد۔ 19 دسمبر (اے پی پی) صدر مملکت ڈاکٹر عارف علوی پارینے کہ وزراء خارجہ و ایلو شرفمند آ مہمان تا پاکستان آ بننگ آ پبی بخیر ءِ کینہ، اسلام آباد کون آ زیباانگا شار و شرفمند آ مہمان تا گرم جوشی نا جوزہ اتون مہمانداری ننکن بھلو شرف نا ہیت اسے، اسلامی کمکار تنظیم (او آئی سی ) نا باسک ملک آتا وزراء خارجہ و بڑزکو کمامدار آتا است انا حب اٹ منتو ار اُن ہرافک 19 دسمبر 2021ء آ اسلام آباد اٹی مروک آ وزراء خارجہ نا کونسل نا 17 می بھاز اہم انگا دیوان اٹی بشخ ہلنگ نا درخواست نا مثبت ورندی ءِ تسر، شرفمند آ مہمان تا داڑی ساڑی گری اوغانستان نا الس تون مسلم امہ نا یکجہتی نا گچین درشانی ءِ۔ پاکستان اٹ مہمانداری ٹی او آئی وسی وزراء خارجہ کونسل نا 17 می بھاز اہم انگا دیوان نا وخت آ تینا خصوصی کلہو اٹی صدر مملکت ڈاکٹر عارف علوی پارے کہ دادے ہرسا بھاز خوشی مننگ ءِ کہ او آئی سی ملک آک اوغانستان اٹی رہینگوک آ ایلم تا گرج آتے پورو کننگ کن اینو اسہ فورم آ یکجا مسنو، بلاشبہ داوخت آ اوغان ایلم تے بنداوی گرج آتے پورو کننگ کن بھاز چیلنج مون تروک ءِ۔ اوپارے کہ اومیت ءِ کہ اسلامی کمکار تنظیم نئے بیرہ اوغان الس تون ہم کوپہ سلنگ نا پکا عزم انا عملی درشانی ءِ کیک بلکن مشکل نا داساہت اٹ اوفتا کمک ءِ کننگ کن سنجیدگی اتون پبی گام گیج ہم چست کیک، اوغان الس مون تروک مشکل آتیٹی تینے تنیا تکپس، ننے غٹ ءِ مون تروک چیلنج آتا مقابلہ ءِ کننگ کن اوفتے پبی امداد فراوان کننگ کن عملی گام گیج کروئی مریک۔ اوپارے کہ اوغانستان نا ہمسایہ و برادر ملک مننگ نا ناطہ پاکستان مدام اوغانستان و اونا الس ءِ ہرممکن کمک فراوان کرینے، 1981 ء ٹی ہراتم پاکستان اوغانستان نا ویل آ او آئی سی وزراء خارجہ کونسل نا اولیکو بھاز اہم انگا دیوان نا مہمانداری ءِ کریسس، نن اینو ہم ہمو جوزہ نا رداٹ او آئی سی نا پلیٹ فارم آن اوغان الس نا کمک کن مخ ءِ تفینن۔ صدر مملکت پارے کہ ننے پکا یخین ءِ کہ او آئی سی نا باسک ملک آک و جہانی برادری نا کمک و مخ تفی آن نن اسہ وار ولدا تینا اسیجائی مسخت آتے مون آ دننگ اٹ ضرور سرسہب مرینہ۔
