اسلام آباد۔ 19 دسمبر (اے پی پی) وزیراعظم عمران خان پارینے کہ اسہ سوگو ءُ اوغانستان اس ڈیہہ کن گچین ءِ، اوغانستان نا ساڑی آ حالیت آک بھاز سنگین ءُ، اوغان الس نا کمک ءِ کننگ کن دمدستی گام گیج نا گرج ءِ، اوغانستان آن ہمسایہ ملک آتیٹی مہاجر آتا بننگ ءِ توننگ کن اوغانستان اٹی سوگو حکومت المی ءِ، پاکستان مہالو آن 30 لکھ آن زیات اوغان مہاجرآتا چار دہائی آن مہمانداری ءِ کننگ ءِ ، ہر راج اٹ انسانی و زالبول آتا حق انا تصور جتا ءِ، ننے داحق آتا بابت حساسیت نا ادراک ءِ کروئی مریک، اگہ حکومت اس تینا ملازم ، طبی عملہ ءِ تنخواہ تننگ کپک تو او سوگو مننگ کپک، اسلامی کمکار تنظیم نا باسک ملک آک فلسطین و کشمیر نا جھیڑہ نا ایسری کن تعلقدار قرارداد آتیا زور شاغر ،اسلاموفوبیا اسہ اہم ءُ ویل اسے، نائن الیون آن پد دا خطرناک حداسکان ودانے، او آئی سی دانا توننگ کن تینا کڑد ءِ ادا کے، اوغانستان نا ساڑی آ تنکی آن پیش تمنگ کن وزرائے خارجہ کونسل پبی ءُ حکمت عملی اس مون آ اتے، اومیت ءِ کہ او آئی سی پرامن اوغانستان کن تینا کڑد ءِ ادا کیک۔ او یک شنبے نادے آ داڑے اسلامی کمکار تنظیم (او آئی سی) نا وزرائے خارجہ کونسل نا 17 می دیوان آن تران کریکہ۔ دیوان آن او آئی سی نا سیکرٹری جنرل حسین ابراہیم طحہٰ ، اسلامی شونداری بینک انا چیئرمین ڈاکٹر محمد سلمان الجاسر، اقوام متحدہ نا ڈپٹی جنرل سیکرٹری انسانی حق، سعودی عرب نا وزیرخارجہ شہزادہ فیصل بن فرحان، ترکی نا وزیر خارجہ میولت کاؤسگلو، اردون نا وزیر خارجہ ایمن الصفدی، نائیجرنا وزیر خارجہ یوسف محمد و وزیرخارجہ شاہ محمود قریشی ئسک ہم تران کریر۔ وزیراعظم عمران خان غٹ بشخ ہلوک آتے بخیر اٹ پارسا پارے کہ اسلامی کمکار تنظیم نا دا اہم انگا دیوان اوغانستان نا ساڑی آ تنکی آ سجفنگ کن بٹنگ انگانے۔ اخس کہ مشکل اوغانستان نا الس ہرفینے پین کس اس ہرفتنے۔ اوغانستان نا حالیت آتا سوب آن غٹ آن زیات نسخان پاکستان ہرفے، اوغانستان چار دہائی آن خانہ جنگی نا گواچی ءِ، داجاگہ نا اسہ بھلو آبادی اس ہمپ و بٹ کرے۔ اوپارے کہ داہیت است جمی نا سوب ءِ کہ کانفرنس اٹ شریک غٹ مہمانک اوغانستان نا حالیت آتیان معلومدار ءُ۔ اوپارے کہ اوغانستان نا بینکنگ نا نظام جمود نا گواچی ءِ، اسہ ملک اسے نا ہم بینکنگ نا نظام اٹ جمود آن او ملک اٹی سوگوی بننگ کپک۔ اوغانستان نا ویل 4 کروڑ انسان تا ویل ءِ۔ اوغانستان نا ساڑی آ تنکی ٹی مہالو آن ہرے مسنے۔ داڑے جوڑ مروک آ جامع حکومت نا عبوری وزیرخارجہ عائد کروک آ مسہ شڑت آتا ایسری نا عزم انا پڑو کرے۔ وزیراعظم پارے کہ ہر راج اٹ انسانی حق و زلبول آتا حق انا تصور ءِ۔ پاکستان اٹ خیبرپختونخوا نا کلچر اوغانستان تون ملک۔ شاری و خلقی آ علاقہ غاتا کلچر اٹی پیدوار ءُ پرخ اسے۔ پشاور نا کلچر اوغانستان تون ملوک آ پاکستان نا شار تیان جتا ءِ۔ نن انسانی و زالبول آتا حق انا بابت حساسیت نا ادراک ءِ بایدے کین۔ اوپارے کہ اوغانستان اٹی حکومت تون تینا ملازم داتسکان کہ ڈاکٹر و طبی عملہ ءِ تننگ کن تنخواہ اف۔ داوڑ اسہ حکومت اس ہم سوگو مننگ کپک۔ اوغانستان آن پاکستان اٹ دہشت گردی نا توننگ کن ہموڑے اسہ سوگو ءُ حکومت اسے نا گرج ءِ۔ پاکستان اوغان جنگ آن پد 80 ہزار جان تا قربانی ءِ تسنے۔ 100 ارب ڈالر آن زیات نا زرگزرانی نسخان ہرفے۔ 30 لکھ آن زیات اوغان مہاجر آتا پدریسہ چار دہائی آن مہمانداری ءِ کننگ ءِ۔ اگہ اوغانستان اٹی امن و سوگوی بتو تو پین مہاجر بننگ کیک۔ مچ آ دنیا ءِ مہاجر آتا ویل مون تروک ءِ۔ ایران ہم اوغانستان اٹی نزوری نا سوب آن پین مہاجرآتون مون تننگ کیک۔ وزیراعظم پارے کہ اگہ شون ہلوک ملک آتیکن مہاجر آک ویل اسے ءُ تو پاکستان کون آ نیزگار ملک آک امر لکھ آ مہاجرآتا مہمانداری ءِ سگنگ کیرہ۔ اومیت ءِ کہ او آئی سی پرامن اوغانستان کن تینا کڑد ءِ ادا کیک۔ وزیراعظم پارے کہ اسلامی شونداری بینک انا چیئرمین نا کنڈآن دمدستی و مریس مدتی گام گیج آک اہم ءُ۔ اوپارے کہ اسلامی کمکار تنظیم نا وزرائے خارجہ اوغانستان نا ساڑی آ تنکی نا ایسری کن اسہ پیدوار ءُ روڈ میپ اسے تون مون آ برے تانکہ اوغانستان اٹی دا تنکی نا چٹفنگ ممکن مننگ کے۔ وزیراعظم پارے کہ کشمیر و فلسطین نا الس ننا کنڈآ ہُننگ ءُ۔ اوفتا انسانی و جمہوری حق ءِ لتاڑنگ انگ ءِ۔ اوفتے اقوام متحدہ نا کنڈآن تروک آ حق آ ہم عملدرآمد مننگ کتنے۔ ننے اسلامی کمکار تنظیم نا فورم آن دا بابت ہم کڑد ادا کروئی مریک۔ وزیراعظم پارے کہ اسلاموفوبیا دنیا ٹی بھاز بھلو ویل اسے۔ اونا بنانائن الیون آن پد مس ہراداسہ خطرناک حداسکان ودانے۔ نیوزی لینڈ نا اسہ مسیت اسے ٹی 50 آن زیات مسلمان تے شہید کننگا دیکی ٹی اسلام نا کلہو آن آگاہی اف ہرادے اسلام نا فہم مفننگ نا سوب آن خلیج ودنگ ءِ او آئی سی کن داہیت اہم ءِ کہ او دا بابت تینا کڑد ءِ ادا کے۔ دیکی اسلام نا برخلاف پروپیگنڈا کیک، رحمت اللعالمین اتھارٹی مچ آ دنیا نا مسلم دانشور آتون سلابت کرسا اونا ورندی ءِ ایتک۔ وزیراعظم پارے کہ نن رحمت اللعالمین اتھارٹی اس جوڑکرینن، دااتھارٹی مچ آ دنیا نا مسلمان اسکالر آتون سلابت کرسا اسلام نا حقی تشخص ءِ تالان کیک اوپارے کہ اسلام اسٹ ءِ و او اسلام ننا نبی کریم صلی اللہ علیہ و آلہ وسلم نا ءِ، نبی کریم صلی اللہ علیہ و آلہ وسلم دنیا نا غٹ انسان تیکن رحمت اللعالمین ءِ ہراوڑ اللہ تعالیٰ غٹ انسان تا رب العالمین ءِ ہمووڑ حضور صلی اللہ علیہ وآلہ وسلم رحمت اللعالمین ءِ۔ اوپارے کہ ننے رحمت اللعالمین اتھارٹی آن مچ آ دنیا ٹی اسلام نا اصل تصور ءِ تالان کروئی ءِ۔ اواو آئی سی نا باسک ملک آتے پارے کہ او اوغانستان ءِ تنکی آن کشنگ کن پبی ءُ حکمت عملی اس مون آ اتیر، اوغانستان نا کمک ءِ کننگ ننا مذہبی فرض ءِ، اوغانستان نا بھلو آبادی اس نیزگاری نا لکیر آن شیف ءُ، دااوغان الس نا بقانا ویل ءِ، اوغان الس نا کمک ءِ کننگ کن دمدستی گام گیج آتا گرج ءِ، اوغانستان نا ساڑی آ حالیت آک بھاز سنگین ءُ۔ اوپارے کہ مچ آ دنیا آنبار ننا زرگزران ہم کورونا غان زہمی مسنے۔
