اسلام آباد۔ 17 دسمبر (اے پی پی) اسلامی کمکار تنظیم نا وزرائے خارجہ نا کونسل نا 17 می بھلا دیوان یک شنبے نادے آ اسلام آباد اٹی اڈ ہلنگ ءِ۔ سعودی عرب بطور چیئراوغانستان نا بابت بھلا دیوان نا سلاہ ءِ تسوسس وخت اس کہ پاکستان دانا خیرمقدم ءِ کرسا سیشن نا مہمانداری نا سلہ ءِ خلکوسس۔ ترجمان دفترخارجہ نا رداٹ او آئی سی نا باسک و مبصر ملک آتا وزرائے خارجہ آن بیدس، بشخ ہلوک آتیٹی اقوام متحدہ، جہانی مالیاتی ادارہ و امریکہ، برطانیہ، فرانس، چین ، روس، جرمنی ، اٹلی ، جاپان و یورپی یونین نا نمائندہ غاک ہم اوار ءُ۔ اوغان عبوری حکومت ہم دیوان اٹی نمائندگی کیک۔ دادیوان اوغانستان اٹی بگڑینگوک آ انسانی حالیت آتا پس منظر اٹ بٹنگ انگانے۔ اوغان الس تون یکجہتی نا درشانی آن بیدس، وزرائے خارجہ کونسل آن اومیت ءِ کہ او اوغانستان اٹی ترندی اٹ بگڑینگوک آ انسانی حالیت، خاص وڑاٹ خور انا کاختی نا بابت آ مون ءِ توننگ، مخلوق نا ہمپ و بٹ و ممکنہ زرگزرانی بھسکاری ءِ توننگ کن گام گیج کیک۔ ترجمان پارے کہ پاکستان داہیت آ یخین تخک کہ اوغانستان تون جہانی برادری نا پدریسہ رابطہ المی ءِ۔ بھلا دیوان نا مہمانداری اوغان الس نا مخ تفی ءِ سوگو کننگ کن پاکستان نا سفارتی کوشست آتا درشانی ءِ۔ بھلا دیوان اوغانستان اٹی امن و سوگوی و اوغان الس نا پدریسہ راجی آسراتی کن پاکستان نا آخبتی عزم و پدریسہ کوشست آتا ڈیک ءِ ایتک۔ دیوان اوغان الس نا انسانی گرج آتے پورو کننگ اٹ کمک کن عملی و پبی گام گیج آتیا سجفنگ نا موقع اس فراوان کیک۔
