اسلام آباد۔ 17 دسمبر (اے پی پی) وزیراعظم عمران خان پارینے کہ حکومت ملکی تاریخ اٹ اولیکو وار نیزگاری نا چٹفنگ و راجی رکھ انا بھلو پروگرام اس ایسونے، پوسکن آ پاکستان جان جوڑی کارڈ دنیا نا یکتا ہیلتھ انشورنس پروگرام ءِ ہرانا مچ آ دنیا ٹی درور ملپک، السی آسودہی نا ڈٹ آتے اولیتی بنداو تیا پورو کننگ حکومت نا اولیت ءِ۔ جمعہ نادے آ وزیراعظم میڈیا آفس آن جاری بیان نا رداٹ وزیراعظم عمران خان نا کماشی ٹی پنجاب اٹی برجا السی آسودہی، راجی رکھ و نیزگاری نا چٹفنگ و بنداوی جان جوڑی نا ڈٹ آتیا جاچ دیوان اس مس۔ دیوان ءِ ہیلتھ کارڈ و احساس راشن رعایت پروگرام آ حوال اٹ پاننگاکہ بروک آ سال جنوری آن مارچ اسکان پنجاب نا غٹ اُراتے 10 لکھ روپئی اسکان مفت درمان نا آسراتی فراوان کننگک۔ داکان بیدس دیوان ءِ احساس راشن رعایت پروگرام نا رداٹ کم کٹیا والا خاہوت ءِ فراوان کروک آ سبسڈی آ پیش رفت و اوڑآن نیزگاری نا چٹفنگ نا گمانی مثبت نتیجہ غاتا بارواٹ ہم معلومدار کننگا۔ دیوان ءِ پنجاب نا بھلاشارتیٹی برجااحساس کس اس لنگڑ خاچپ، لنگرخانہ و پناہ گاہ تیا ہم معلومدار کننگا۔ دیوان ءِ پاننگاکہ ڈٹ دیہاڑی دار مزور آتیکن خاص وڑاٹ یخ انا موسم اٹ ریلیف نا سوب مننگ ءِ۔ دیوان ءِ سرسہب ورناپروگرام ، پوسکن آ پاکستان ہاؤسنگ و اسپورٹس ڈرائیو آ ہم حوال تننگا۔ دیوان اٹی پنجاب اٹی بلدیاتی گچین کاری تا حکمت عملی آ ہم گپ و تران مس۔ وزیراعظم ڈٹ آتیا است جمی نا درشانی ءِ کرسا برجا السی آسودہی ڈٹ آتے معینہ مد اٹی پورو کننگ نا پارت جاری کرے۔ دیوان اٹی بنجائی وزیر شاہ محمود قریشی، فواد چوہدری، شفقت محمود، حماد اظہر، مخدوم خسروبختیار، سینیٹر سیف اللہ نیازی، قومی اسمبلی نا باسک عامر محمود کیانی، وزیراعلیٰ پنجاب سردار عثمان بزدار و صوبائی وزیر جان جوڑی پنجاب ڈاکٹر یاسمین راشد ئسک بشخ ہلکر۔
